Jam’iyya mai mulki a matakin tarayya ta sake fuskantar babban koma-baya a Jihar Kano, biyo bayan murabus ɗin babban jigon jam’iyyar kuma tsohon Manajan Daraktan Hukumar Tashoshin Jiragen Ruwa ta Ƙasa (NPA), Arch. Aminu Dabo, wanda ya ajiye muƙaminsa na Shugaban Masu Ruwa da Tsaki (Caucus Chairman) na APC a Ƙaramar Hukumar Dambatta tare da ficewa daga jam’iyyar gaba ɗaya.
Sanarwar murabus ɗin ta fito ne ta hanyar wata wasiƙa mai kwanan wata 7 ga watan Oktoba, 2026, wadda Arch. Aminu Dabo ya aike wa shugaban jam’iyyar APC na Mazabar Dambatta ta Gabas, inda ya sanar da janye zama ɗan jam’iyyar mai mulki a hukumance.
Mataimakin Arch. Aminu Dabo a ɓangaren yaɗa labarai, Abdullahi Othman, shi ne ya tabbatar da batun murabus ɗin a cikin wata sanarwa da ya raba wa manema labarai a birnin Kano ranar Alhamis, 15 ga watan Oktoba, 2026.
Ya bayyana cewa tsohon shugaban na NPA bai fayyace ainihin dalilansa na yanke wannan hukunci a cikin wasiƙar ba, haka kuma bai bayyana sabuwar jam’iyyar da zai koma ba a halin yanzu.
Ficewar Arch. Aminu Dabo wanda ya taɓa zama Kwamishinan Filaye da Tsare-tsare a Kano, wanda ya kuma nemi takarar gwamnan jihar a baya, kuma shugaba kuma mamallakin kwalejojin kiwon lafiya masu zaman kansu na Aminu Dabo College of Health Sciences and Technology da Aminu Dabo College of Nursing Sciences ta jefa ƴan siyasa a jihar cikin fargaba da hasashen sauyin sheƙa yayin da ake tunkarar babban zaɓen 2027.
