Kwanan nan, babban dan kasuwar Amurka, kana babban darektan kamfanin kera motocin lantarki na Tesla, Mr. Elon Musk, ya bayyana ta shafin sada zumunta na X cewa: “Sin tana da kyau sosai, ina matukar karfafa gwiwar kowa da kowa ya je ya gani.” Daga baya, mahaifiyarsa, Maye Musk, ta sake buga rubutunsa tare da cewa: “Kowane birni na Sin yana da nasa yanayin da ke janyo hankulan masu ziyara, akwai wuraren al’adu daban-daban da za a ziyarta. Gine-gine da tituna suna da tsafta, ana kula da su sosai. Mutane sun kasance masu ladabi da jajircewa, kuma suna mutunta juna.” Ta kuma jaddada: “Akwai tsaro a kasar, don haka ina jin dadin zuwa Sin.”
Lallai, kalaman na Musk da na mahaifiyarsa sun dace da wasu kalmomi masu alaka da kasar Sin da yanzu haka ke jan hankalin masu ziyartar shafukan sada zumunta na kasa da kasa, ciki har da “China Travel” da “China Cool”. A cikin ’yan shekarun nan, yayin da kasar Sin ke gaggauta inganta bude kofarta ga ketare, yawon shakatawa a kasar Sin na kara samun farin jini a fadin duniya. Alkaluman da aka samar sun shaida cewa, a farkon rabin shekarar bana, adadin baki da suka shigo Sin ya kai sama da miliyan 22 da dubu 910, adadin da ya karu da kashi 20.4% idan aka kwatanta da shekarar da ta gabata, daga cikinsu kuma, yawan wadanda suka shigo ba tare da biza ba ya kai kashi 77.7%. Musamman ma a yayin da kasashe da dama ke fama da matsanancin zafi a bana, karin baki masu yawon bude ido na zuwa Sin, inda suke jin dadin yanayi a wasu sassa masu albarkatun sanyi da kuma na’urorin sanyaya daki da ake yawan samu a kasar, a sa’i daya kuma, fasahohin zamani da suka gani a kasar, irinsu jirgin kasa mai saurin gudu da biyan kudi ta wayar salula da mutum-mutumin inji da jirage marasa matuka sun burge su matuka.
Daga cikin bakin, akwai dan kasar Afirka ta Tsakiya mai suna Aime, yayin da yake ziyartar birnin Beijing, ya yi mamakin ganin mutum-mutumin inji masu siffofin dan adam da ke iya yin kofi da wasanni, kuma ya ce: “Fasahohin zamani na Sin, musamman na Beijing, suna da kayatarwa.” A Shenzhen da ke kudancin kasar Sin kuma, motoci marasa direba na Pony.ai suna zirga-zirga a sassan birnin, wadanda suka burge baki da yawa da suka zo birnin, har suka dauki “hawan mota mara direba” a matsayin abin da dole su gwada a birnin. A wuraren shakatawa, baki da yawa sun kuma gwada hidimomin isar da kaya ta jirage marasa matuka, fuskokinsu na cike da mamaki da farin ciki. Akwai kuma wasu masu shirya bidiyo da suka zo kasar Sin yawon shakatawa, wadanda suka dauki fita da dare a matsayin gwada “kasada”, amma sai suka gano cewa yanayin tsaro na Sin yana ba mace damar fita ita kadai ba tare da damuwa ba. Sai kuma wata mai shirya shirin bidiyo mai suna Josie ‘yar kasar Australiya, bayan da ta yi yawon bude ido a kasar Sin, ta gano cewa, a baya, ba ta san kasar Sin sosai ba, kuma masaniyarta game da kasar Sin bisa ga wasu rahotannin da aka samar a baya ba ta gaskiya ba ce.
A hakika, jama’ar kasashen waje sun dade suna fahimtar kasar Sin bisa labarai da rahotanni da ba su dace ba da kafofin watsa labarai na kasashen yamma suka samar bisa son zuciyarsu, wadanda suka haifar da rashin fahimta da bahaguwar fahimta a kan ainihin yanayin kasar Sin. Duk da haka, karin baki na zuwa kasar Sin, inda suka gani da idonsu yadda kasar ta kasance, kana suka ga tituna masu tsaro har a cikin dare, da saukin rayuwa wadda kusan wayar salula ke iya biyan kusan dukkan bukatunka ta fannonin riguna da abinci da gidan kwana da kuma zirga-zirga, da yadda ake samar da na’urorin sanyaya daki a wuraren taruwar jama’a da kuma isasshiyar wutar lantarki, da kuma hadewar al’adun gargajiya da fasahohin zamani, kuma dukkan wadannan suka taimaka wa bakin gyara fahimtarsu da ba ta dace ba game da kasar Sin.
A daidai lokacin da Mr. Musk ya ba da shawarar ziyartar Sin, ofishin jakadancin kasar Amurka a kasar Sin ya sake fitar da abin da ake kira “gargadin balaguro zuwa Sin,” yana yada jita-jita marasa tushe kamar “rashin kwanciyar hankali a Sin, hadarin tafiya, da kama baki ba bisa ka’ida ba.”, gargadin da suke fitarwa a-kai-a-kai.
Amma kamar yadda Bahaushe kan ce, “karya fure take ba ta ‘ya’ya.” To shin mene ne ainihin yanayin kasar Sin? Sassaukar amsa ita ce gani ya kori ji, ma’ana abin sai wanda ya gani.
Bana ita ce shekarar cudanyar al’umma da musayar al’adu tsakanin Sin da Afirka, kuma tuni kasar Sin ta sanya hannu kan yarjejeniyoyin hadin gwiwar yawon shakatawa da kasashen Afirka sama da 30. Gani ya kori ji, muna fatan ‘yan uwanmu na kasashen Afirka ku yi amfani da wannan dama ku zo ku gani da idonku yadda Sin ta kasance. A nan kasar, akwai babbar ganuwa mai dadadden tarihi, akwai jirgin kasa mai saurin gudu. Kasa ce mai tsawon tarihi, kuma kasa ce da ke rungumar makomar ci gaban zamani, don haka, mene ne ainihin yanayin Sin? Jama’a, muna jiran amsoshinku.
