Kungiyar Barcelona na da damar lashe kofin La Liga na bana tun a yau, idan sakamakon wasu wasanni ya tafi yadda suke so.
A halin yanzu, Barcelona na kan gaba a teburin gasar da maki 85 bayan buga wasanni 33. Za ta kara da Osasuna a filin wasan El Sadar Stadium a wasan mako na 34.
Domin Barcelona ta zama zakara a yau, dole ne ta doke Osasuna, sannan kuma Real Madrid wadda ke matsayi na biyu ta yi kunnen doki ko ta sha kashi a wasanta da Espanyol ranar Lahadi. Idan hakan ta faru, Barcelona za ta lashe kofin duk da sauran wasanni hudu da suka rage.
Sai dai idan Barcelona ta kasa samun nasara a yau, za ta jira zuwa mako mai zuwa inda za ta kara da Real Madrid a filin Spotify Camp Nou.
Idan har suka doke Real Madrid a ranar 10 ga watan Mayu, hakan na nufin za su lashe kofin LaLiga a gaban babban abokiyar hamayyarsu, lamarin da zai ƙara musu armashi a wannan kakar wasa.
