Na (9) dana (10) su ne mafi muni
1. Tattauna sirrin matsalolin gidan miji da abokai da dangi:
A kowane gidan aure ana samun matsaloli, sai dai masu hankali acikin matan aure ke boyewa su bar komai a wurin Allah. Daukan sirrinki da mijinki ki sanar da wasu yana kawo babbar matsala a rayuwar aure.
2. Yawan tattauna matsalolin miji da kushe kokarinsa a gaban ‘ya’yansa:
Wannan yana sa yara su raina kokarin da mahaifinsu ke yi acikin gida
3. Cusawa yara kiyayyar amaryar mahaifinsu (kishiya):
Wata rana za ki iya mutuwa ki bar yara a hannun kishiya ko rashin lafiya mai tsanani. To idan kin cusa musu kiyayyar, wannan zai iya haifar matsala babba a tsakaninsu.
4. Kiyayyar yaran kishiya da neman ganin bayansu:
Shin ko kin san cewa Allah zai iya daukaka ‘ya’yan kishiryarki su zamo manyan mutane masu daraja wata rana?
Sannan kuma su zama sune masu daukan nauyinki, to idan Allah ya kaiki wannan lokacin da wanne ido za ki kallesu.
5. Gasar haihuwar yara domin samun kaso mafi girma acikin gadon dukiyar miji:
Shin ko kin san cewa mijinki zai iya talaucewa kamin mutuwarsa? Ko kuma keki da yaran ku rigashi mutuwa.
6. Tunanin cewa miji zai mutu ya barki da yara a cikin wahala:
Waye ya sanar da ke cewa miji ke fara mutuwa ya bar matarsa? Mata sun fi yawan mutuwa su bar mazajensu sanadiyyar (haihuwa, hawan jini, ciwon sikari, tashin gobara a gida, kunar ruwan zafi, da sauransu.
Idan ki ka je assibiti, zaki samu mafi yawan masu jinya a (Dakin karban agaji na gaggawa na mata, da ICU) mata ne da kananan yara, kalilan ne maza acikinsu.
7. Kyauta acikin dukiyar miji ba tare da saninsa ba:
Dukiyar miji amana ce a gareki, dole ki sanar dashi duk abunda za ki aikata acikin dukiyarsa.
Ko bako zai shigo gida (mace ko namiji) dole ki sanarda miji domin neman yardarsa da amincewarsa.
8. Fifita bukatun naki dangi sama da dangin miji:
‘Yan uwa da dangin miji su ne sukafi kusanci dashi sama da dangin matarsa, kar ki tilasta mijinki yiwa danginki dawainiyar da baya yiwa nashi dangi.
9. Rashin godiya da hango ni’imar gidan wasu:
Dawainiyar gidan aure tana da yawa sosai, sai jarumi acikin maza ke iya daukar nauyin matarsa da yara na tsawo shekaru 10, 20, 30, ko 40
Abinci, sutura, sabulai, magani, ruwan sha, kudin lantarki, kudin gas, kudin makarantar yara, kudin tafiya mataranta da kai yara makaranta.
Wallahi duk matar dake raina kokarin mijinta, ba zatayi karshe mai kyau ba.
10. Sabawa miji da goyon bayan yara zuwaga barna:
Duk abunda yara ke aikatawa acikin gida, mahaifiyarsu ta san komai.
Wasu mata za su goyi bayan yara zuwaga barna saboda son zuciya irin nasu.
Idan miji ya hana yara fita, sai bayan mijin yaje aiki ko kasuwa sai mahaifiyarsu ta basu izinin fita.
Idan miji ya hana yara zuwa biki, mahaifiyarsu ta basu izini.
Idan miji ya hana yara fita babu hijabi, sai mahaifiyarsu ta basu damar fita da gyale.
Idan miji ya hana yara fita yawon banza, ko mu’amala da abokan banza, sai mahaifiyarsu ta basu izini.
Idan wani abu ya faru marar kyau, sai mahaifiyarsu tace kaddara ce kowa da irin tasa.
