Ƙungiyar ƙwallon ƙafa ta Leicester City ta sanar da cewa kocinta Ruud van Nistelrooy ya bar kulob ɗin, bayan watanni bakwai kacal da fara aiki.
Leicester ta koma gasar Championship ne bayan ta kasa tsira daga Premier League, inda ta ci wasanni shida kacal a kakar da ta gabata.
- Xinjiang Ta Bude Hanyar Jigilar Kayayyaki Ta Kasa Da Kasa Zuwa Afirka Ta Farko
- Ganduje Ya Ajiye Shugabancin Jam’iyyar APC
Wannan ya sa ƙungiyar ta sallami tsohon koci Steve Cooper a watan Nuwamba, sannan ta ɗauki Van Nistelrooy.
Sai dai kocin ɗan kasar Holland ɗin bai samu nasarar ceton ƙungiyar daga faɗuwa gasar gajiyayyu ba.
A cikin wata sanarwa, Van Nistelrooy ya ce: “Ina so na gode wa ‘yan wasan Leicester, masu horaswa da duk jami’an kulob ɗin saboda haɗin kai da kuma ƙoƙarinsu a lokacin da nake koci. Ina kuma godiya ga magoya bayan kulob ɗin bisa goyon bayansu. Ina miƙa fatan alheri ga Leicester a gaba.”
Wasan farko da Leicester za ta buga a gasar Championship zai kasance a gida, inda za ta kara da Sheffield Wednesday ranar Laraba, 10 ga watan Agusta mai zuwa.
A baya, Van Nistelrooy ya taɓa riƙe matsayin kocin riƙon ƙwarya na Manchester United, bayan da suka sallami Eric Ten Hag kafin su ɗauki Ruben Amorim daga Sporting CP ta ƙasar Portugal.
