Babban kwamitin majalisar bada shawarwari kan harkokin siyasar kasar Sin ko kuma CPPCC a takaice, ya kira taron murnar shiga sabuwar shekara ta 2026, da safiyar yau Laraba a nan birnin Beijing. Shugabannin kasa da na jam’iyyar kwaminis ta kasar Sin, ciki har da shugaban kasar Sin Xi Jinping, da wakilan jam’iyyun demokuradiyya, da manyan jami’an kungiyar masana’antu da kasuwanci ta kasar, da wakilan mutanen da ba na wata jam’iyya ba, da jami’an sassan gwamnatin kasar daban-daban, tare da wakilai daga bangarori da kabilu daban-daban na Beijing, sun hallara don murnar shiga sabuwar shekara ta 2026.
Babban sakataren kwamitin kolin jam’iyyar kwaminis ta kasar Sin, wanda kuma shi ne shugaban kasar, kana shugaban kwamitin tsakiya na rundunar sojin kasar Sin Xi Jinping, ya gabatar da muhimmin jawabi. Yana mai cewa, shekarar dake karewa wato 2025, shekara ce mai babbar ma’ana, inda al’ummar kasar Sin suka haye wahalhalu, tare da jajircewa wajen cimma babban burin raya tattalin arziki, da kyautata rayuwar dan Adam, da gudanar da wasu manyan ayyuka.
Shugaba Xi ya kuma jaddada cewa, a shekarar 2025, CPPCC ta bayar da sabuwar gudummawa ga daukaka ci gaban harkokin jam’iyyar kwaminis da na kasar Sin baki daya, ta hanyar ba da shawarwari, da nasihohi dangane da batun zurfafa yin gyare-gyare daga dukkan fannoni a cikin gida, da ingiza ci gaba mai inganci.
Har wa yau, shugaba Xi ya jaddada cewa, 2026, shekara ce ta farko a cikin shirin raya kasa na tsawon shekaru biyar karo na 15, don haka ya dace CPPCC ta maida hankali kan bada nagartattun shawarwari, tare da sa ido bisa tafarkin demokuradiyya, game da batun tsarawa, gami da aiwatar da shirin raya kasa na tsawon shekaru biyar karo na 15, don kara zamanantar da kasar Sin ta hanyar karfafa gwiwar al’umma, da neman cimma daidaito, da tattaro hikimomi da karfi. (Murtala Zhang)
