Aƙalla mutane 28 ne aka tabbatar da mutuwarsu a daren ranar Talata, 23 ga watan Janairu, 2024, bayan da wasu ƴan bindiga suka kai mummunan hari a ƙauyen Kwahaslalek da ke Ƙaramar Hukumar Mangu a Jihar Filato, duk da dokar hana fita ta sa’o’i 24 da gwamnatin jihar ta kafa.
Maharan sun kutsa cikin ƙauyen ne da tsakar dare, inda suka buɗe wuta kan mazauna yankin galibinsu mata da ƙananan yara da suka taru a wuri guda domin neman tsira tare da ƙona gidaje da dama kafin jami’an tsaro su kai ɗauki.
Rahoton Daily Trust ya bayyana cewa harin ya auku ne a daidai lokacin da Gwamna Caleb Mutfwang ya sanya dokar hana fita sakamakon taɓarɓarewar tsaro a garin Mangu, lamarin da ya jefa al’ummar yankin cikin fargaba da zullumi.
Jami’an tsaro sun tabbatar da faruwar lamarin, inda suka bayyana cewa an tura ƙarin dakarun sojoji da ƴan sanda domin kwantar da tarzoma, dawo da doka da oda, da kuma bin sawun maharan da suka tsere bayan tafka ɓarnar.
Shugabannin al’umma da ƙungiyoyin kare haƙƙin bil-adama a jihar sun yi tir da harin, suna masu buƙatar gwamnatin tarayya da hukumomin tsaro da su ɗauki matakan bai ɗaya domin kawo ƙarshen hare-haren da ke ci gaba da laƙume rayukan fararen hula a jihar.
