Hukumar NAFDAC ta lalata kayayyaki marasa inganci da kuɗinsu ya haura naira biliyan 5 a wani babban taron da aka gudanar a wurin zubar da shara na Angwan Rere da ke Lafia. Kayayyakin sun fito ne daga jihohin Nasarawa, Benue, da Kogi, da Neja da Filato, inda hukumar ta ce an cafke su ne sakamakon sintirin da ma’aikatanta ke yi domin daƙile yaɗuwar jabun kaya a kasuwanni.
Daraktar-Janar ta NAFDAC, Farfesa Christianah Adeyeye, wadda Daraktan Yankin Arewa ta Tsakiya, Kenneth Azikiwe, ya wakilta, ta bayyana cewa kayayyakin da aka lalata sun haɗa da abincin gwangwani marasa inganci, da kayan ƙara dandano, da magunguna na bogi, da kayan kwalliya marasa inganci, da sabulai na jabu, da sinadarai da sauran na’urorin lafiya da suka sabawa ƙa’ida. Ta ce wasu ‘yan kasuwa masu gaskiya su ne suka miƙa wasu daga cikin kayayyakin bayan sun fahimci hatsarin da suke haifarwa.
- Sanusi II Ya Gudanar Da Hawan Nassarawa Duk Da Umarnin ‘Yansanda A Kano
- EFCC Ta Kama Tsohon Gwamnan Anambra Chris Ngige A Abuja
NAFDAC ta jaddada cewa manufarta ita ce kare lafiyar jama’a ta hanyar kiyaye kasuwa daga shigar jabun kaya da marasa inganci. Farfesa Adeyeye ta ce hukumar za ta ci gaba da sintiri don tabbatar da cewa ingantattun kayayyaki kaɗai ake sayarwa. Ta kuma nemi jama’a da su ci gaba da ba da bayanai kan duk masu kerawa ko yada kayayyaki da ka iya cutarwa.
A nasa ɓangare, Kwamishinan tsaro da harkokin cikin gida na Nasarawa, Usman Baba, wanda ya wakilci gwamnatin jihar, ya yaba wa NAFDAC bisa yadda take kare jama’a daga barazanar jabun kaya. Ya tabbatar da cewa gwamnatin jiha za ta ci gaba da ba da goyon bayan da ake bukata domin tabbatar da tsaron lafiyar al’umma da ingancin kayayyakin da ake amfani da su.
