Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) ta sanar da samun nasarar cafke ɗumbin haramtattun ƙwayoyi da darajarsu ta haura naira biliyan biyar (N5bn) a tashoshin jiragen ruwa na ƙasar, tare da kama wani ɗan kasuwa da ke shirin tafiya birnin Milan na ƙasar Italiya ɗauke da hodar iblis a filin jirgin saman Murtala Muhammed da ke Legas.
A cikin wata sanarwa da Kakakin Hukumar ta NDLEA, Femi Babafemi, ya fitar, ya bayyana cewa an tare kayayyakin ne a tashoshin jiragen ruwa biyo bayan bayanan sirri da binciken haɗin gwiwa da aka gudanar a kan wasu kwantenonin da aka shigo da su, inda aka gano ɗimbin magungunan ƙwayoyi masu haɗari da suka haɗa da opioids da wasu kwayoyin da ba a amince da shigarsu Nijeriya ba.
A ɓangare guda kuma, jami’an hukumar sun cafke ɗan kasuwan ne mai suna Augustine Nnamdi, a daidai lokacin da yake ƙoƙarin shiga jirgin da zai tashi zuwa Milan na ƙasar Italiya, bayan da bincike ya nuna cewa ya ɓoye ƙunshin haramtattun ƙwayoyin a cikin kayansa da nufin yin safararsu zuwa nahiyar Turai.
Hukumar ta bayyana cewa an tsare wanda ake zargin domin zurfafa bincike kan hanyoyin da yake amfani da su da kuma waɗanda suke haɗa baki da shi a cikin wannan haramtacciyar sana’a, domin gurfanar da su a gaban kotu.
Shugaban Hukumar ta NDLEA, Birgediya Janar Mohamed Buba Marwa (mai ritaya), ya jinjina wa dakarun hukumar bisa tsayin daka da nuna ƙwarewa wajen toshe hanyoyin shigo da ƙwayoyi da fitar da su, yana mai sake nanata aniyar hukumar na fatattakar masu fataucin miyagun ƙwayoyi da kuma hana Nijeriya zama matattarar safarar haramtattun kayayyaki.
