Sojojin Nijeriya sun yi nasarar kuɓutar da mutane da dama da ƴan bindiga suka yi garkuwa da su, biyo bayan wani sumame na musamman da suka kai maɓoyar ƴan ta’adda a ranar Litinin, 5 ga watan Oktoba, 2026, a Jihar Zamfara.
Aikin ceton ya gudana ne a yayin da dakarun sojin ke gudanar da sintirin kakkabe ɓata-gari a yankunan dazuzzukan da ke ƙarƙashin Ƙaramar Hukumar Tsafe da kewaye, inda sojojin suka yi artabu da ƴan bindigar a wata musayar wuta mai zafi da ta tilasta wa maharan tserewa cikin daji tare da barin mutanen da suka sato suka tsare.
Daga cikin waɗanda aka kuɓutar har da mata da ƙananan yara waɗanda aka sace kwanakin da suka gabata a kan hanyoyin tafiye-tafiye da kuma ƙauyukan yankin. Sojojin sun kuma lalata maɓoyar ƴan bindigar tare da ƙwato babura da wasu kayayyakin da maharan ke amfani da su wajen tafka ɓarna.
Bayan kammala aikin, sojojin tare da haɗin gwuiwar Ƴansanda sun kwashe mutanen da aka ceto zuwa cibiyar lafiya ta sojoji domin duba lafiyarsu da ba su kulawar da ta dace, kafin a miƙa su a hukumance ga iyalansu da kuma jami’an gwamnatin jihar.
Kwamandojin rundunar sun jaddada cewa dakarun ba za su sassauta ba wajen ci gaba da bin sahun ƴan bindigar a dukkan dazuzzukan jihar, tare da buƙatar mazauna yankunan da su ci gaba da bai wa jami’an tsaro sahihan bayanan sirri domin samun galaba a kan maharan.
