Shawarar Shugaban Kasa Bola Ahmed Tinubu na cire ministan kudi, Wale Edun, da ministan gidaje, Arc. Ahmed Musa Dangiwa, daga mukamansu ta haifar da muhawara mai zafi a fadin Nijeriya, musamman a fannin siyasa, tattalin arziki da kasuwanci.
An bayyana sauyin ne a matsayin wani karamin garambawul a majalisar ministoci, kamar yadda wata sanarwa daga Ofishin Sakataren Gwamnatin Tarayya ta tabbatar.
A maimakon Wale Edun, shugaban kasa ya nada Farfesa Taiwo Oyedele, wanda aka ce an dauke shi ne domin ya jagoranci sabon salo a harkokin kudi na kasa.
Wasu masu sharhi sun ce wannan sauyi bai zo da mamaki ba, duk da cewa lokacin da aka yi shi ya ba mutane mamaki. Rahotanni daga majiyoyi na cikin gwamnati sun nuna cewa cire Edun ya samo asali ne daga matsalolin lafiya.
An bayyana cewa Edun, wanda ya kai kimanin shekaru 70, ya taba yin murabus a baya a gwamnatin Jihar Lagos saboda matsalar lafiya, sannan a shekarar 2025 ma ya taba yin jinya a kasashen waje.
A bangaren Dangiwa kuwa, majiyoyi sun ce cire shi ya samo asali ne daga rashin gamsuwar shugaban kasa da yadda yake tafiyar da aikin ma’aikatar gidaje, inda ake bukatar saurin aiwatar da ayyuka a fadin kasa.
Bayan saukarsa, Wale Edun ya nuna godiya ga shugaban kasa, yana mai cewa ya yi alfahari da damar da aka ba shi na yi wa Nijeriya hidima.
Ya ce ya fara aiki ne a matsayin shugaban kwamitin mika mulki, sannan mai ba shugaban kasa shawara kan manufofin kudi, kafin daga bisani ya zama ministan kudi.
Edun ya ce gwamnatin Tinubu ta gaji tattalin arziki mai rauni, amma sun yi kokarin daidaita shi, inda ya ce hakan ya taimaka wajen habakar tattalin arziki daga kusan kashi 2 zuwa sama da kashi 4.
Ya kuma ce an samu raguwar hauhawar farashi daga kashi 35 zuwa kusan kashi 15, yana mai cewa wadannan gyare-gyare sun taimaka wajen dawo da kwarin gwiwar masu zuba jari da kuma inganta tattalin arziki gaba daya.
A karshe, ya gode wa ‘yan majalisar zartarwa, gwamnonin jihohi da sauran masu ruwa da tsaki bisa hadin kai da suka ba shi goyon baya a lokacin mulkinsa.
