Shugaban Amurka, Donald Trump, ya umurci a gudanar da bincike kan lafiyar ƙwaƙwalwar tsohon shugaban ƙasar Amurka Joe Biden lokacin da yake kan mulki, yana zargin hadiman sa da ƙulla wani “makirci” don yaudarar jama’a game da halin lafiyar ƙwaƙwalwarsa.
Trump ya mayar da hankali kan amfani da na’urar autopen, wadda ke saka hannu ta atomatik don amincewa da takardu – wata na’ura da shugabanni da dama, ciki har da Trump kansa, suka taɓa amfani da ita. Sai dai ya ce amfani da ita a lokacin Biden na iya zama shaida cewa ana ɓoye gaskiyar halin da tsohon shugaban ya shiga ciki.
- Trump Zai Shirya Liyafar Musamman Ga Manyan Ƴan Crypto
- Zaman Lafiya A Duniya: Mu Baje Sin Da Amurka A Faifai
“Makircin nan na daga cikin mafi haɗari a tarihin siyasar Amurka,” inji Trump a wata sanarwa da ya fitar a ranar Laraba.
Joe Biden, mai shekaru 82, ya ƙaryata zargin, yana mai cewa da’awar Trump ba ta da tushe kuma siyasa ce kawai ke motsa shi. “Ni nake yanke hukunci lokacin mulkina,” inji Biden. “Dokoki, da yin afuwa, da dukkan umarnin shugabanci – ni nake yinsu.”
Sai dai Jam’iyyar Republican ta ƙara matsa lamba wajen tambayar ko Biden yana da lafiyar da ta dace domin yin mulki. Wani kwamitin Majalisar Wakilai da jam’iyyar ke jagoranta na neman wasu manyan jami’an gwamnatin Biden domin su ba da shaida game da yanayin lafiyar sa tun lokacin yana shugaban ƙasa.
Lamarin ya ƙara tsananta ne bayan fitowar wani littafi mai taken Original Sin da ya zargi wani na kusa da Biden da ɓoye yadda jikinsa ya gaza yayin yaƙin neman zaɓen 2024, wanda daga ƙarshe ya janye. Wannan ya ƙara sanya tambayoyi kan ko an san da cutar sankarar da ya kamu da ita tun da wuri, musamman ganin yadda aka ce ta bazu zuwa ƙasusuwa.
