Wasu alƙaluman hukumar Lafiya ta duniya WHO sun bayyana cewa mutum fiye da dubu 1,300 ne tsananin zafi ya kashe a ƙasashen Turai daga ranar 21 ga watan da muke na Yuni kawo yanzu, wanda ke matsayin adadi mafi yawa da nahiyar ta taɓa gani a tarihi.
Tsananin zafin da ke matsayin mafi ƙololuwa da nahiyar ta Turai ta taɓa gani, a Faransa kaɗai mahukuntan ƙasar sun ce kusan mutum 1000 tsananin zafin ya kashe daga Larabar da ta gabata zuwa yammacin Lahadi yayin da rahoton WHO ke cewa a jumlace akwai mutanen da yawansu ya haura dubu 1,300 waɗanda zafin ya kashe tun bayan tsanantarsa a ranbar 21 ga watan da muke.
Ko a ƙarshen mako an ga yadda tsananin zafin ya ci gaba da tsananta koda yake ya fara nausawa yankin gabashin nahiyar wato ƙasashen da bisa al’ada aka san su da yanayi na tsananin sanyi kuma tuni wasu daga cikin ƙasashen suka fara fitar da bayanan ƙaruwar masu mutuwa da waɗanda ke kamuwa da cutuka sanadiyyar zafin.
Miliyoyin turawa ne suka tare a wuraren shaƙatawar bakin ruwa cikin kwanakin ƙarshen mako don samun sassauci daga matsanancin zafi a wani yanayi da masana a ɓangaren lafiya ke ci gaba da gargaɗin mahukuntan don ɗaukar matakan bai wa jama’a kariya.
A ranar Lahadi kaɗai Turawa miliyan 191 sun fuskanci zafin da ya kai maki 35 a ma’aunin Celcius yayin da aka ga zafi na daban wanda ya kai ƙololuwa a ƙasashen Jamus da jamhuriyyar Czech kana Hungary da kuma Poland da zafinsu ya kai maki 41 karon farko da nahiyar ke ganin irin haka.
Hasashen masanan yanayi daga Jamus ya nuna cewa al’ummar nahiyar miliyan 381 banda Turkiyya za su ga tsananin zafin da zai riƙa haura maki 30 lamarin da Dr Tedros Adhanom Ghebreyesus ke cewa wajibi ne hukumomi su samar da matakan sassauci ga jama’a don kaucewa ƙaruwar mace-mace da rashin lafiya mai alaƙa da zafin.
