‘Yansanda a jihar Borno sun tsare wata matar aure mai suna Fatima Abubaka ‘yar shekara 25 bisa zarginta da hallaka mijinta mai suna Goni Abbah ta hanyar zuba masa guba a cikin abincinsa.
Kwamishinan rundunar ‘yansanda na jihar, Abdu Umar wanda ya sanar da hakan a yayin da aka baje kolin matar a harabar rundunar, ya ce, jami’ansa sun kamo ta ne a ranar 19 ga watan Oktoban 2022 a unguwar Doki, inda ya kara da cewa, marigayi Gone, shine Limamin Masallaci ne a yankin.
Ya ce, ta kashe shi ne bayan ya dawo daga Masallaci bisa zarginta da sa masa guba a cikin abincinsa, inda bayan ya ci abincin, yanayinsa take ya sauya.
Nan da nan aka shi asibitin kwararru na jihar amma daga bisani, bayan an maido da shi gida ya rasu.
A cewarsa, a bayanan da Fatima ta baiwa ‘yansanda, ta tabbatar da cewa ita ta kashe mijinta (Goni Abba), ta hanyar sa masa guba a cikin abincinsa, da zarar an kammala bincike za a gurfanar da ita a gaban kotu.
Da take yiwa manema labarai bayani, Fatima ta ce, ita ce matar Goni ta biyu kuma ta gaji da zama da shine ya sa ta aikata masa hakan, inda ta kara da cewa, tun farko ba ta so ta auri Goni ba, amma ta aure shi ne bayan aurenta na farko ya mutu.
Ta ce ta sha guduwa daga gidansa amma iyayen suna dawo da ita gidansa, inda ta kara da cewa, ta kuma sha barin gidansa ta je ta kwana a kango.
A cewarta, marigayi na ba ta dukkan irin kulawar da ta kamata, kuma har yanzu ba ta aminta cewa, ita ce ta kashe shi da hannun ta ba.
