Fatima Mubaraka matashiya ce da ta jajirce wajen amfani da kafafen yaɗa labarai na zamani wajen bunƙasa sana’arta ta ɗinki. A hain yanzu tana hulɗa da mutane da dama daga sassan ƙasar nan dama wasu ƙasashen duniya. A hirarta da wakilinmu Muhammad Baƙir Bello, ta bayyana yadda ta fara sana’ar da yadda iyayen ta suka tsayu domin ganin ta yi nasara da kuma yadda ta samu nasarar horas da wasu matasan inda da dama daga cikinsu na cin gashin kasu a halin yanzu. Ga dai yadda hirar ta kasance:
Za mu so mu san takaitaccen tarihinki?.
Assalamu alaikum, da farko sunana Fatima Mubaraka sunan mahaifina Muhammad Isa mahaifiyata kuma Zahra El Yakub, na yi makaranta na a Kano firamari da sakandari ɗina a Kano, sannan na yi Jami’an Kimiya da Fasaha na wudil, ina da ƴan uwa guda uku.
Ta yaya kika tsinci kanki a wannan sana’ar?
Yadda na tsinci kaina a wannan sana’ar da nake yi na ɗinki shi ne, na kasance ina son ƙyale-ƙyale tun ina ƙarama, sannan kuma ina son kwatanta duk abin da na gani, saboda haka nake gani kamar wata baiwa ce na duk abin da na gani wanda ya shafi ɗinki sai na gwada, da haka na fara sannan sai na shiga inda zan ƙara koya don in samu ƙwarewa sosai, na fara ne tun shekarar 2020 har zuwa yau.
Kina amfani da kafafen sa da zumunta wajen kasunwancin ki ?
Eh ina amfani da kafafen sada zumunta kamar su Instagram da Tiktok da kuma Facebook da WhatsApp, na fara buɗe group kafin na zo na buɗe Page, a halin yanzu muna da masu bibiyan shafin mu mutane masu yawan gaske.
Zuwa yanzu kin yi shekara nawa kina wannan Sana’ar ?
Da fara wannan sana’ar zuwa Yanzu aalla na yi shekara 6 zuwa bakwai a wannan sana’ar na ɗinki, amma kafin nan tun ina arama nake ɗan yin sana’a a lokacin muna siya ne sai mu siyar amma yanzu mu muke ɗinka kayan da muke siyarwa.
Ta yaya kika iya haɗa karatu da sana’a?
Alhamdulillahi ta fuskacin haɗa karatu da sana’a bai kasance min da wahala ba saboda dama tun ina da ƙarancin shekaru na fara kasuwanci, iyaye na sunsa ido sosai wajen ganin na maida hankali a karatu, saboda haka bai bani wahala ba, ina samun lokutan da bana komai sai in tsara abubuwa na, a lokacin da nake jami’a, makarantan mu tana da nisa daga wajen mu, don haka nake ware ranaku kamar ƙarshen mako idan na samu ayyuka a wajen abokan karatuna sai na yi amfani da wannan lokacin in ɗinka masu saboda haka gaskiya bansha wahala ba wajen haɗa karatu da sana’a, kusan zan iya cewa lokacin da sana’a ta take bunƙasa nafi ƙoƙari a makaranta.
Aƙalla yanzu kin koya wa mutane nawa aiki ?
Eh toh akwai masu koyan sana’ar a waje na, wanda ada ban yi tunanin hakan ba, amma saboda yau da gobe mutane suna sha’awan aikin, shi yasa muka yi tunanin fara koyarwa, zuwa yanzu kusan na koyar da mutune aƙalla basu gaza goma sha biyar ba, wanda yanzu ko wanne a cikin su ya tsayu da kafan sa,
Wasu irin nasarori da ƙalubane kika fuskanta?
Alhamdulillahi ta fuskacin nasarori sai dai mu yi godiya ga Allah da kuma iyayen mu mahaifina da mahaifiyata da gudunmawar da suka bani wajen ganin na tsayu da aafana, wanda su suka fara siyan min keken ɗin na sai kuma gwaggona wato ƙanuwar mahaifiyata saboda tsayuwarta da jajircewarta, wanda tun muna da shago ɗaya gashi yanzu har sun zama biyu, wannan yana daga cikin nasarorin da muka samu, kuma Alhamdulillahi duk wasu ƙananun buƙatu ba sai ka Jira an yi maka ba, babban nasara shi ne koyar da mutane da na yi.
Ta ɓangaren ƙalubale gaskiya ba zan iya cewa ga wani ƙalubalen da nake fuskanta ba Alhamdulillahi.
Wani irin buri kike dashi a wannan sana’a ?
Burina shi ne ya zama na samar da katafaren wuri wanda zai mana branch mai girma wanda za a dinga yin ‘production’ kuma ya samu karɓuwa a kowane ɓangare na ƙasannan, sannan kuma ya zama duk bayan wasu lokutan muna yaye waɗanda muka koya wa sana’a domin su tsaya da ƙafan su kuma suma su koyar, gaskiya wannan shi ne kusan babban burina, kuma ya zama mun buɗe reshe a wajaje daban-daban, sannan kuma ina son nan gaba in dinga ɗaukan nauyin masu ƙaramin ƙarfi da marayu ina taimaka masu wajen koya masu sana’a kyauta gaskiya shi ne burina.
Kina da saƙo na musamman da kike son isar wa masu karatu ?
Sakona zuwa ga masu karatu musamman matasa, shi ne a wannan lokaci ba lokaci ne na ɓoye baiwar da Allah ya yi wa mutum ba,mutum ya yi amfani da baiwar da Allah ya yi masa ta hanya mai kyau wajen ganin ya taimaka wa kansa da al’umma baki ɗaya.
Mun gode
Nima na gode
