‘Yan bindiga sun sace Amos Magbon, shugaban makarantar koyar da lissafi ta tarayyar da ke a garin Manchok a karamar hukumar Kaura a jihar Kaduna.
An ruwaito cewa, lamarin wanda ya auku a ranar Talata ‘yan bindigar sun kuma kashe Daniel Yatai, mahaifi ga wakilin kamfanin dillancin labarai na kasa da ke garin na Manchok Philip Yatai.
- Gwamnatin Gombe Za Ta Tallafa Wa Wadanda Ambaliyar Ruwa Ta Shafa A Funakaye
- Dalilan Da Yasa Sanatoci Ke Kokarin Ganin Sun Tsige Buhari Daga Mulki —Sanata Bulkachuwa
Daya daga cikin ‘ya’yan marigayin Christiana Yatai, ta ce sun sace wata ‘yar uwarta mai suna Brenda Friday, ‘yar shekara 21 kuma daliba a ajin karshe a kwalejin ilimi ta Gidan Waya.
Ta ce sun shigo gidansu ne da misalin karfe 11:15 na daren ranar bayan sun fasa kofar shiga gidan.
Shi ma wani dan marigayin Joseph Yatai ya ce, ‘yan bindigar sun tuntubi iyalansa tare da gabatar da bukatar kudin fansa Naira miliyan 15 kafin su sako yarinyar.
Shi ma dan uwan shugaban makarantar Innocent Magbon, ya ce ‘yan bindigar sun tuntubi iyalan shugaban, inda suka bukaci a ba su Naira miliyan 15.
Babu wata sanarwa da kakakin rundunar ‘yan sandan jihar, DSP Mohammed Jalige ya fitar kan faruwar lamarin.
