Yayinda babbar gasar kofin Duniya ta bana da za a buga a kasashen Amurka, Mexico da Canada ke karatowa, akwai manyan yan wasan kwallon kafa da kasashensu sun samu nasarar tsallakawa zuwa gasar amma Ba za su samu damar zuwa ba sakamakon raunin da suka samu, da yake dai zuwa yanzu kasashen basu fitar da jerin yan wasan da zasu wakilcesu ba amma dai akwai wadanda ko an fitar da sunayensu Bazasu samu damar zuwa ba:
Samu Aghehowa (Spain)
Dan wasan gaban Fc Porto Samu Aghehowa ya samu rauni a gwuiwarsa a watan Fabrairu, dan wasan mai shekaru 21, yana daga cikin yan wasa masu zafin nama wajen zura kwallaye da ake ganin zai iya taimakawa tawagar kasar Spain a kokarinta na ganin ta lashe gasar Kofin Duniya.
Patrick Agyemang (Amurka)
An cire dan wasan gaban na Amurka daga wasan da ya bugawa Derby County bayan raunin da ya samu a wasan, Agyemang na daga cikin yan wasanda ke karawa tawagar Amurka kwarin gwuiwa a wasanninsu na baya, raunin da ya samu ya zama tamkar koma baya ga tawagar Amurka wadda Mauricio Pochettino ke jagoranta.
Valentin Carboni (Argentina)
Dan wasan tsakiya Valentin Carboni, wanda yanzu haka ke zaman aro a kungiyar Racing, ya ji rauni a gwuiwarsa a watan Fabrairu, wanda hakan ya kawo karshen fatansa na shiga tawagar Argentina, dan wasan mai shekaru 21 ya riga ya samu damar buga wasa tareda manyan yan wasan tawagar ciki har da kyaftin din tawagar Lionel Messi.
Cameron Carter-Vickers (Amurka)
Dan wasan baya Cameron Carter-Vickers har yanzu akwai shakku dangane da zuwansa gasar kofin Duniya ta bana, bayan an yi masa tiyata a farkon kakar wasar bana, duk da cewa bai yanke tsammani gaba daya ba, damarsa ta wakiltar Amurka ta ragu sosai.
Hugo Ekitike (Faransa)
Dan wasan gaba na Liverpool Hugo Ekitike ya samu rauni a jijiya a wasan da Liverpool tayi rashin nasara a hannun PSG a gasar Zakarun Turai, raunin da ya samu zai yi sanadiyar da ba zai buga wani mummunan rauni da ya hana shi shiga gasar Faransa.
Juan Foyth (Argentina)
Dan wasanda ya lashe gasar cin kofin Duniya tareda Argentina a shekarar 2022 Juan Foyth ya samu rauni a gwuiwarsa a watan Janairu yayin da yake bugawa Villarreal wasa, dan wasan bayan zai rasa damar sake wakiltar Argentina a matakin gasar cin kofin Duniya.
Luis Ángel Malagón (Mexico)
Mai tsaron ragar kasar Mexico Luis Ángel Malagón yana murmurewa daga raunin da ya samu, idan bai murmure ba zuwa karshen kakar wasa ta bana hakan zai yiwa tawagar kasar Mexico mummunar illa a shirinta na tabuka abin azo a agani yayinda suke shirin karbar bakuncin gasar.
Joaquin Panichelli (Argentina)
An cire Joaquin Panichelli daga wasan da kungiyarsa ta Strasbourg ta samu nasara bayan ya samu rauni a karo na biyu cikin shekaru biyu, wannan koma-baya ya kawo karshen fatansa na shiga cikin tawagar Argentina ta gasar cin kofin Duniya.
Rodrygo (Brazil)
Tauraron Brazil Rodrygo Kuma dan wasan Real Madrid ba zai buga gasar ba yayinda yake kan murmurewa daga raunin da yake fama dashi, rashinsa babban rashi ne ga tawagar kasar Brazil wadda ke fatan cigaba da zama a matsayi na farko a jerin kasashen da suka fi lashe gasar a tarihi.
Mohammed Salisu (Ghana)
Dan wasan baya na Ghana Mohammed Salisu yana fuskantar yiwuwar rashin wakiltar kasarsa ta Ghana yayinda yake fama da jinya bayan raunin da ya samu a kafarsa a watan Janairu, wanda hakan ya sa ba zai buga wa Ghana wasa ba.
Discussion about this post