Rundunar ‘Yansanda reshen birnin tarayya (FCT) ta samu nasarar cafke wasu mutum uku bisa zarginsu da yin fashi da addabar hanyar Gwarinpa da ke Abuja tare da kwato motar da suka sace.
Jami’in yada labarai na hukumar reshen FCT, DSP Josephine Adeh, ya bayyana nasarar da suka samu bayan kiran waya daga wajen al’umar da abun ya shafa.
- Lassa Da Shawara Sun Kashe Mutum 183 A Jihohi 36 Da Abuja
- ‘Yansanda Sun Yi Ruwan Tiyagas Kan Magoya Bayan Peter Obi A Ebonyi
Mutanen yankin sun shaida musu cewa a safiyar ranar Asabar da wasu ‘yan bindiga sun mamaye yankin domin yin fashi..
Ya ce, bayan samamen da ‘yansanda suka kai, sun cafke uku daga cikin ‘yan tawagar masu fashin tare da kwato mota kirar Mercedes Benz GLK 350 ruwan tokaa mai lamba REG. NO. GWA 740 FM, tare da kwamfutoci, wayoyin salula da wasu muhimman kadarori da suka sata daga hannun jama’a.
DSP Adeh ya ce, “Yan bindigar da yawansu ya kai 19 sun mamaye yankin Gwarinpa tare da yin fashi ga jama’a da kwace musu kayayyaki ciki har da mota Mercedes benz da wasu muhimman kadarori.
“Yansanda sun kama mutum uku da suka hada da Shetima Abubakar, dan shekara 22; Yakubu Iliya, shekara 22, da kuma Haruna Amadu, tare da motar da suka yi fashinta kirar Mercedes Benz GLK 350 da wasu kadarorin da muka kwato.”
