Rundunar ‘Yansandan Jihar Jigawa ta kama mutane tara da ake zargi da hannu a wasu laifuka daban-daban bisa kai hari kan ofishin ‘yansanda, da kuma rikicin da ya barke a Kasuwar Gujungu da ke Ƙaramar Hukumar Taura.
Mai magana da yawun rundunar a jihar, SP Shi’isu Adam, ne ya tabbatar da hakan cikin wata sanarwa da ya fitar a ranar Litinin a Dutse, babban birnin jihar.
A cewarsa, kamen na daga cikin ƙoƙarin da rundunar ke yi na tabbatar da doka da oda da kuma kare rayuka da dukiyoyin al’umma a faɗin jihar.
Da yake bayani kan rikicin Kasuwar Gujungu, Adam ya ce a ranar 26 ga Yuli, 2026, rundunar ta kama mutum biyu da ake zargi da hannu a tashin hankalin da ya auku a kasuwar.
Ya bayyana cewa rikicin ya samo asali ne bayan ɗan wani saɓani tsakanin wani soja da wani matashi mai suna Biniya Alhaji Ibrahim, mai shekaru 25, ɗan Ƙaramar Hukumar Miga, a cikin kasuwar.
Kakakin ‘yansandan ya ce rikicin ya rikide zuwa tashin hankali, inda ake zargin sojan ya caka wa Biniya wuka, lamarin da ya yi sanadin raunukan da daga bisani suka yi ajalinsa bayan likita ya tabbatar da mutuwarsa.
Ya ƙara da cewa bayan faruwar lamarin, wasu fusatattun matasa sun yi amfani da rikicin wajen kai hari kan ofishin ‘yansanda, inda suka harba kibiyoyi ga jami’an tsaro, tare da ƙona shaguna biyu a cikin kasuwar.
Adam ya ce binciken da aka gudanar bisa bayanan sirri ya kai ga kama mutum biyu da ake zargi da hannu a wannan rikici.
Hakazalika, ya bayyana cewa rundunar ta kuma kama wasu mutum shida da ake zargi da kai hari kan jami’an ‘yan banga.
Sannan ya kara da cewa, ana cigaba da bincike don ganin an kamo duk wanda ke da hannu kan wannan rikici.
