‘Yansanda a jihar Zamfara, sun tabbatar da cewa jami’an da aka tura yankin Bukkuyum da Gummi sun kwato bindiga kirar AK-47 da harsasai guda 18 daga wajen ‘yanbindigar a jihar.
Kwamishinn ‘yansandan jihar Mista Ayuba Elkanah, ya ce,rundunar za ta ci gaba da lalubo masu garkuwa a dukkan inda suka boye, domin fatattakarsu da kawo karshensu.
Kwamishinan ya ce,“Ranar 19 Yuli 2022, rundunar ‘yansandan da ke yankin Gummi da Bukkuyum sun samu wani kira, wanda ake sanar da su cewa,wasau masu garkuwa a kan babur sun dira a Saran Gamawa da Unguwar Mata da niyyar kashe mutane da kuma kama wasu domin yin garkuwa da su.
Saboda haka, rundunar ‘yansanda da hadin gwiwar ‘yansintiri na wannan yankin suka hadu, don yin fito-na-fito da ‘yanbindigar.
“Sakamakon haka an yi wa daya daga cikin masu garkuwar mummunan rauni, tare da kwace bindiga kirar AK-47 da kuma wasu kwanson alburusai,”in ji shi.
Elkanah ya yaba da yadda jami’an tsaron na hadin gwiwa suka gudanar da aiki kafada da kafada da kuma samun nasarar da suka yi.
Kwamishinan ya kara da cewa, yanzu haka, ya umarci rundunar ‘yansandan da ke Anka da DPO din da ke yankin da su kara wa ‘yansandan da ke zagaye karfi, yadda za su iya fuskantar dukkan wasu masu aikata miyagun laifukan da ke wannan yanki.
Rundunar, ta tabbatar wa da al’ummar wannan yankin cewa, za ta ba su kariya ta musamman. A karshe, ya yi kira da babbar murya ga al’ummar wannan yanki da su ci gaba da ba jami’an tsaro hadin kai domin ganin an samu nasara a harkar tsaron.
