Yerima Shettima Ya Gudanar Da Aikin Duba Lafiya Kyauta Ga Mutane 500 A Kaduna

A kokarinsa na inganta lafiyar al’umma, Ambasada Yerima Shettima, daya daga cikin manyan masu neman kujerar sanata a Kaduna ta tsakiya, ya shirya wani gagarumin aikin duba lafiya kyauta a cibiyar kiwon lafiya a matakin farko da ke Unguwar Shaba cikin karamar hukumar Kaduna ta Arewa, inda aka yi wa kimanin mutane 500 aiki.

Ambasada Yerima ya bayyana cewa wannan shiri ya samo asali ne daga akidarsa wadda ta ta’allaka kan cewa rayuwa hidima ce ga Bil’adama. Ya ce wannan aiki wata hanya ce ta ba da gudummawa ga al’umma, alkawarin da ya ce zai ci gaba da karfafa shi a nan gaba.

Ya tabbatar da aniyarsa ta ci gaba da kuma fadada ayyukan kiwon lafiyar idan har ya samu damar zama sanata. Ya ce a halin yanzu yana gudanar da wannan tallafi ne a matsayinsa na mutum daya, amma idan ya samu madafun iko zai samu karin dama da karfi wajen tabbatar da cewa agajin lafiya ya kai ga kowa.

Shirin aikin duba lafiyar zai ci gaba a wasu yankuna, inda tawagar za ta wuce karamar hukumar Chikun a karshen mako mai zuwa.

Aikin duba lafiyar ya mayar da hankali ne kan wasu muhimman matsalolin lafiya da al’ummar yankin ke fuskanta, ciki har da zazzabin cizon sauro da cutar gyambon ciki da gwaje-gwaje da bayar da magunguna da kuma shirin tsarkake ciki ga yara.

LABARAI MASU NASABA

Mambobin NYSC 4, Soja da Mutum 1 Sun Rasu A Hatsarin Mota A Adamawa

Sarki Sanusi II Ya Tuɓe Rawanin Mai Unguwar Rikadawa Kan Badaƙalar Fili

Yerima ya bayyana cewa tuntuba kai tsaye da al’umma na taimaka masa wajen mai da hankali kan bukatunsu da kuma yanke shawara cikin gaggawa domin inganta lafiyar jama’a. Ya kuma yi kira ga sauran masu hannu da shuni da su hada kai wajen irin wadannan ayyukan jin kai.

A nasu jawaban, shugabannin Unguwar Shaba sun bayyana shirin a matsayin babban aikin alheri da ni’ima ga mazauna yankin. Sun yi kira ga sauran masu hali da su mara baya ga irin wadannan ayyuka tare da rokon al’umma da su ba da hadin kai da addu’o’i domin cimma burin Yerima na zama sanata mai wakiltar Kaduna ta tsakiya a majalisar tarayya.