Gwamnatin Birtaniya ta kammala shirye-shiryen mayar wa Gwamnatin Tarayyar Nijeriya Dala miliyan 9.5 na kuɗaɗen da aka gano cewa an same su ne ta hanyar cin hanci da rashawa. Wannan na ƙunshe ne cikin wata sanarwa da Babban Ofishin Jakadancin Birtaniya a Abuja ya fitar a ranar Juma’a.
Sanarwar ta bayyana cewa babban Lauyan Jersey, Mark Temple KC, ya rattaba hannu kan wata yarjejeniyar fahimtar juna (MoU) a watan Disambar 2025, domin sauƙaƙa dawo da kuɗaɗen zuwa Nijeriya. An ce za a yi amfani da kuɗaɗen ne wajen tallafa wa wani muhimmin aikin gine-ginen more rayuwa a ƙasar.
- Birtaniya Ta Amince Da Kafa Falasɗin A Matsayin Ƙasa
- Fashi Da Makami: An Yanke Wa ’Yan Nijeriya Hudu Mazauna Birtaniya Hukuncin Daurin Shekara 55 A Gidan Yari
Tun a ranar 29 ga Nuwamba, 2023, Lauyan ya nemi kotun Royal Court ta Jersey ta kwace kuɗaɗen da ke cikin wani asusun banki, bisa dokar kwace kadarorin da aka samu ta haramtacciyar hanya. A ranar 12 ga Janairu, 2024, kotun ta amince da kwace kuɗaɗen bayan ta tabbatar da cewa kuɗaɗen sakamakon wata badakalar cin hanci ce, inda ’yan kwangila suka karkatar da kuɗaɗen gwamnati domin amfanin manyan jami’an Nijeriya da abokan hulɗarsu.
Sanarwar ta ce wannan yarjejeniya ta biyo bayan wasu yarjejeniyoyi biyu da aka kulla a baya tsakanin birnin Jersey da Nijeriya, waɗanda suka haifar da dawo da sama da dala miliyan 300. An yi amfani da kuɗaɗen wajen manyan ayyukan tituna guda uku: hanyar Lagos–Ibadan, gadar Niger ta biyu, da kuma aikin hanyar Abuja–Kano. A halin yanzu, an kammala ayyukan Lagos–Ibadan da Gadar Niger ta biyu, yayin da sabbin kuɗaɗen za su taimaka wajen kammala aikin hanyar Abuja–Kano mai tsawon kilomita 375.
Da yake tsokaci kan batun, Mark Temple KC ya ce dawo da kuɗaɗen na nuna ƙarfin dokokin kwace kadarori wajen yaƙi da cin hanci da rashawa. Shi ma Ministan Shari’a na Nijeriya, Lateef Fagbemi (SAN), ya ce wannan nasara ta tabbatar da ingancin haɗin gwuiwar Nijeriya da ƙasashen waje, tare da ba da tabbacin cewa za a yi amfani da kuɗaɗen da aka dawo da su yadda ya dace bisa yarjejeniyar da aka cimma.
Discussion about this post