A baya bayan nan, gwamnatin Amurka ta dauki wasu matakai na kokarin matsa lamba ga wasu kasashe, don tabbatar da cewa ba su rungumi kayan hada na’urorin laturoni na “Chips” da kasar ke kerawa ba, ciki har da samfurin “Ascend” da katafaren kamfanin fasahohi na Huawei ke kerawa, wanda hakan a zahiri ke shaida yunkurin Amurka na aiwatar da fin karfi, da baiwa kasuwanninta kariya.
Duk da cewa Amurka ta bayyana matakin a matsayin na tsaron kasa, a daya hannu masharhanta na ganin hakan ya sabawa ka’idar adalci ta kasuwanci, zai kuma yi mummunan tasiri ga ci gaban fasahohin sadarwa. Kazalika, matakin na Amurka ba zai dakile ci gaban da Sin ke samu a fannin ba, sai dai ma ya gurgunta tsarin samarwa, da rarraba hajoji masu nasaba da fasahohin sadarwa tsakanin sassan kasa da kasa, da hana kasashen duniya cikakkiyar dama ta zabar hanyarsu ta gina fasahohin sadarwa, da fasahar AI bisa hakikanin bukatunsu.
- An Kashe ‘Yan Ta’adda 6,260, An Ceto Mutane 5,365 Acikin Shekaru Biyu – Hedikwatar Tsaro
- Daga Xi’an Zuwa Astana: Me Muka Koya Daga Taron Kolin Sin Da Kasashen Tsakiyar Asiya
Duk da matakan na Amurka, a halin da ake ciki kamfanonin Sin masu kera nau’o’in “chips” a cikin gida na ta karuwa, inda kamfanoni irin su Huawei, da Biren, da Enflame, da YMTC ke kan gaba wajen samun manyan nasarori a fannin.
Kasuwar “chips” ta Sin a fannin fitar da kayayyaki ta bunkasa, daga darajar da ta kai yuan biliyan 559.1 a shekarar 2018, zuwa sama da yuan tiriliyan 1.1 a shekarar 2024 da ta gabata. Bugu da kari, duk da koma baya na dan lokaci da fannin ya gamu da shi sakamakon yunkurin danniya na Amurka, akasarin kamfanonin fasahohin sadarwa na Sin sun jure wannan yanayi tare da kara karfafuwa, har ma wasu sun kai ga gina nasu manhajojin sarrafa na’urori masu kwakwalwa bisa fasahohin kashin kai.
Tabbas, bai dace batun tsaron kasa ya zama makamin dakile harkokin samar da ci gaba ba. Manufofi dake haifar da wariya, da mamaye kasuwar wasu kasashe na da matukar illa, domin kuwa suna iya gurgunta daidaito, da aminci da ake bukata a fannin bunkasa fasahohin zamani. A daya hannun, manyan damammaki da sassan kasa da kasa za su ci gajiyarsu, za su tabbata ne kadai idan an yi hadin gwiwa a fannin kirkire-kirkire, maimakon kafa shingaye barasa amfani ga kowa.
