Al’ummar Jihar Filato sun sake shiga wani sabon tashin hankali, bayan da wasu miyagun ƴan bindiga suka harbe wani mutum har lahira a garin Fann da ke Ƙaramar Hukumar Barkin Ladi, a safiyar ranar Lahadi, 9 ga watan Agusta, 2026.
Kamar yadda ainihin rahoton ya tabbatar daga Daily Trust, ɗanyen aikin ya faru ne da misalin ƙarfe 8:00 na safiyar ranar Lahadin, a daidai lokacin da marigayin ke kan hanyarsa ta zuwa coci domin gudanar da ibada, kafin maharan su yi masa kwanton-ɓauna su katse masa numfashi a take.
Wata mazauniyar yankin mai suna Erica Dung, wadda ta shaida aukuwar lamarin, ta nuna tsananin baƙin ciki game da wannan asarar rai, inda ta bayyana cewa kisan ya jefa dukkanin mazauna yankin cikin mummunar fargaba sakamakon yawaitar hare-hare a garuruwan ƙaramar hukumar.
A nasa ɓangaren, Sakataren Yaɗa Labarai na ƙungiyar matasan yankin na Berom Youth Moulders, Rwang Tengwong, ya fito fili ya yi tur da wannan ta’addanci, inda ya siffanta shi a matsayin mummunan aiki da ya zama wajibi jami’an tsaro su ɗauki ƙwaƙƙwaran mataki a kai ba tare da ɓata lokaci ba.
Daga ƙarshe, ƙungiyar ta yi gargaɗi gami da kira ga Gwamnatin Jihar Filato da jami’an tsaro da su hanzarta kafa tsauraran matakan sintiri a waɗannan yankuna masu rauni domin bayar da kariya, yayin da har zuwa lokacin haɗa wannan rahoto, jami’an tsaron jihar ba su fitar da wata sanarwa ba game da aukuwar lamarin.
