Mutanen da za su tsaya takara a ƙarƙashin jam’iyyar Nijeriya Democratic Congress (NDC) sun yaba wa jagoran Jam’iyyar na Ƙasa, Sanata Henry Seriake Dickson, biyo bayan wallafa sunayen ƴan takara na hukuma da Hukumar Zaɓe ta yi.
Wallafa sunayen ƴan takarar da INEC ta yi ya cire fargabar da aka kwashe makonni ana yi tsakanin ƴan takarar jam’iyyar, musamman waɗanda ke neman kujeru a Majalisar Tarayya.
Mambobin jam’iyyar sun bayyana Sanata Dickson a matsayin jagoran kwantar da hankula wanda ya sami nasarar daidaita saɓani sakamakon zaɓen fitar da gwanaye, tare da haɗa kan shugabannin jihohi da kuma kauce wa rikicin cikin gida gabanin zaɓen shekarar 2027.
Yayin da suke yaba wa da tsarin, da yawa daga cikin ƴan takara sun jinjina wa zaɓen fitar da gwanaye na jam’iyyar saboda yadda aka gudanar da shi a bayyane kuma ba tare da karɓar kuɗaɗe a hannun ƴan takara ba.
Sanata Nkechi Nwaogu, wadda ita ce ƴar takarar sanata na NDC a Abia ta tsakiya kuma mamba a Majalisar dattawa ta 8, ta yaba da salon shugabancin siyasar Dickson a lokacin ƙalubalen gabatar da sunayen ƴan takara.
“Jagoran mu Sanata Seriake Dickson ya cancanci yabo saboda yadda ya jagoranci mu lokutan ƙalubale da kuma fitar da ƴan takara,” in ji Nwaogu.
Ta kuma yi kira ga waɗanda basu samu tikiti ba da su kasance masu biyayya
Haka zalika, wani dan takara daga Jihar Edo ya ƙarya jita-jitar cewa an karɓi kuɗi domin ba da tikiti, inda ya bayyana cewa tattaunawar da aka yi da shugabannin jam’iyyar na ƙasa ta maida hankali ne kawai kan haɗin kan jam’iyya da kuma sulhu na dabarun siyasa maimakon buƙatar kuɗi.
Haka kuma, masu neman takarar da ba su samu nasara ba sun alƙawarta goyon bayansu ga jam’iyyar.
Mazi Nnamdi Dickson Iroegbu, wanda ya nemi takarar Majalisar Wakilai ta Aboh Mbaise/Ngor Okpala a Jihar Imo, ya tabbatar da cewa zai ci gaba da kasancewarsa a jam’iyyar duk da cewa sunansa ba ya cikin jerin sunayen da aka wallafa.
Shugabannin jam’iyyar sun bukaci dukkan mambobi da su haɗa kai, su maida hankali kan ƙoƙarin sulhunta mambobi bayan zaɓen fitar da gwanaye, kuma su kasance a bayan ƴan takarar NDC a faɗin Nijeriya domin yin adawa ta haɗin kai.
A wata sabuwa kuma,NDC ta tabbatar da Mrs. Asemota a matsayin ƴar takarar Sanatan Edo ta kudu.
Jam’iyyar Nijeriya Democratic Congress (NDC) ta bayyana cewa Mrs. Epelle-Asemota Bridgitte Osayuki ce yar takarar da aka sani a hukumance domin neman kujerar Sanata a yankin Edo ta Kudu, yayin da ta yi watsi da kuskuren da hukumar zaɓe ta yi na sauya sunanta.
Wannan bayanin ya biyo bayan wallafa bayanan ƴan takara da Hukumar Zaɓe Mai Zaman Kanta ta Ƙasa (INEC) ta yi a kwanan nan.
Hàkan na zuwa ne bayan INEC ta saka sunan Mrs. Asemota amma sai tayi amfani da hoton wani mai neman takara daban da kuma shaidun karatunsa.
A wata sanarwa da Agada Abuh Theophilus, Darakta Mai Kula da Sabbin Kafafen Yaɗa Labarai da Sadarwa na Jam’iyyar NDC ya fitar, jam’iyyar ta ɗora alhakin kuskuren a kan wasu mutane a cikin hukumar INEC, kuma ta tabbatar da cewa an bi duk hanyoyin mika sunaye na doka sau da ƙafa.
Yayin da take maida martani kan sukar siyasa da ake yiwa jam’iyyar, NDC ta yi Allah-wadai da yadda cin zarafin yan takarar ta daga jam’iyyun adawa.
Jam’iyyar ta kuma jaddada goyan baya ga yar takararta bisa tsawon shekarun da ta shafe tana hidimta wa al’umma a Jihar Edo da kuma kyakkyawar dangantakar iyalinta a yankin, inda ta tuna cewa ita ce yar takarar Jam’iyyar Labour ta Majalisar Tarayya a zaɓen 2023, kuma tsohuwar Shugabar Ƙungiyar Shugabannin Makarantun Jihar Edo, sannan tsohuwar shugabar Ƙungiyar Malamai ta ASUSS.
