Jorge Messi, mahaifi kuma wakilin shahararren ɗan wasan ƙwallon ƙafa na duniya, Lionel Messi, ya rasu a ranar Asabar yana da shekaru 68, kamar yadda tsohuwar ƙungiyar da Lionel Messi ya fara buga wa ƙwallo, Newell’s Old Boys, ta bayyana.
Jorge shi ne mahaifin Lionel Messi kuma wakilinsa a harkar ƙwallon ƙafa.
A baya ya taɓa bayyana cewa bai taɓa tsammanin ɗansa zai kai matsayin da ya kai a fagen ƙwallon ƙafa ba.
Jorge ya taɓa cewa, “A lokacin da na kai ɗana wata ƙungiyar ƙwallon ƙafa a Argentina, sai suka ce ba zai iya buga ƙwallo ba saboda gajartarsa da kuma wata matsalar lafiya da yake fama da ita a lokacin.
“A lokacin ba ni da isasshen kuɗin da zan ɗauki nauyin maganinsa, amma ban rasa ƙarfin gwiwa ba.”
A tsawon rayuwarsa, Jorge ya kasance ɗaya daga cikin mutanen da suka taka muhimmiyar rawa wajen taimaka wa Lionel Messi wajen samun nasara a harkar ƙwallon ƙafa.
A gaban mahaifinsa, Lionel Messi ya lashe kyautar Ballon d’Or sau takwas, sannan ya taimaka wa ƙasar Argentina ta lashe gasar cin Kofin Duniya a shekarar 2022.
Kafafen yaɗa labarai na Argentina sun ruwaito cewa Jorge Messi ya rasu ne a ranar Juma’a a wani asibiti da ke birnin Rosario na ƙasar Argentina, bayan fama da rashin lafiya.
Jorge ya kasance mai horar da ɗansa na farko tun lokacin da Messi yake ƙarami.
Daga baya ya tafi Spain a matsayin wakilin Lionel Messi lokacin da ɗansa ya koma makarantar horas da matasa ta La Masia da ke Barcelona.
Lionel Messi ya taɓa bayyana irin gudunmawar da mahaifinsa ya bayar wajen nasarar da ya samu a fagen ƙwallon ƙafa.
Ya ce, “Mahaifina ya taimaka min sosai, kuma shi ne ya ƙarfafa ni wajen ci gaba da fafatawa domin samun nasara a ƙwallon ƙafa.”
Jorge Messi ya kasance tare da ɗansa tun farkon tafiyarsa a harkar ƙwallon ƙafa har zuwa lokacin da ya zama ɗaya daga cikin fitattun ‘yan wasan ƙwallon ƙafa a tarihi.
