Fitaccen Mawakin gwamnan Jihar Bauchi, Sanata Bala Muhammad, wato Alhaji Ibrahim Sabo Mai Kukuma mai wake ‘Bauchi Sai Bala’ ya fice daga tafiyar Bala.
Mawakin ya shelanta goyon bayansa ga dan takarar Gwamnan Jihar na jam’iyyar APC, Air Marshal Sadique Baba Abubakar, a zaben 2023 da ke tafe.
- Buhari Ya Halarci Wajen Kaddamar Da Hako Man Fetur A Bauchi
- Gwamnan Bauchi Ya Gabatar Da Kasafin Kudi Na Naira Biliyan 202.6 Na Shekarar 2023
A wani faifayin bidiyo da kuma hotunansa da aka nada tare da Air Marshal Sadique (mai ritaya) a wajen wani taron karbar wadanda suka sauya sheka zuwa jam’iyyar APC a karamar hukumar Ningi, an gano da jiyo Mawakin na rera baitocin waken siyasa ga Sadiq.
Ita da wakar ‘Bauchi Sai Bala’ ta zama bakandamiyar wakar da PDP da gwamna Bala Muhammad suka yi amfani da ita a zaben 2019 wanda kuma har bayan kafa gwamnati ana yawan sanyata a wajen tarukan siyasa da na gwamnati wanda har ta kan sanya gwamna Bala fitowa ya dan takara rawa idan aka sanyata.
Wakar an mata zubin salo na fikira da basira wacce ake jero matsalolin da suke damun Bauchi da kuma kiran jama’a da su zabi Bala Muhammad a cikinta.
Kwatsam kuma sai a jiya mawakin ya sauya inda ya yi amfani da ita ga babban abokin takarar Gwamna Bala, wato Air Marshal na jam’iyyar APC a zaben 2023.
A cikin baitocin waken da wakilinmu ya ji tare da saurara cikin nutsewa, ya fahimci cewa kalmomi kusan iri daya mawakin ya yi amfani da su, illa kawai yanzu na kira da a zabi Sadiq da cewa ‘Bauchi Sai Sadik’.
Alhaji Sabo dai ya yi fice matuka wadda har aka canza masa suna zuwa mai wakar Bauchi sai Bala don haka fitarsa daga masoya da magoya bayan gwamna Bala ya zo wa jama’a da mamaki matuka.
