Real Madrid na jiran rahoton likitoci kan irin raunin da Jude Bellingham ya ji a wasan da suka doke Rayo Vallecano 2-1 a yau Lahadi. Ɗan wasan tsakiyar ya ji rauni ne cikin mintuna 10 kacal da fara wasan, lamarin da ya tilasta wa kocin Real Madrid sauya shi da Brahim Díaz.
An hango Bellingham, mai shekaru 22, yana fita daga filin wasa na Santiago Bernabéu cikin yanayi na damuwa domin samun kulawar likitoci. Idan har aka tabbatar raunin zai ɗauki lokaci mai tsawo kafin warkewa, hakan na iya hana shi shiga jerin ƴan wasan Ingila a wasannin ƙasa da ƙasa na watan Maris.
- Shin Alonso Ya Cancanci Kora A Real Madrid?
- Real Madrid Ta Shiga Halin Damuwa Bayan Wasanni Uku Ba Tare Da Nasara Ba
Tawagar Ingila za ta buga wasannin sada zumunta da Uruguay a ranar 27 ga watan Maris, sannan ta ƙara da Japan a ranar 31 ga watan. Waɗannan wasanni na da muhimmanci, kasancewar kocin Ingila, Thomas Tuchel, zai duba su kafin ya fitar da jerin sunayen ƴan wasan da zai tafi da su gasar cin kofin duniya a watan Mayu.
Idan raunin ya hana Bellingham buga waɗannan wasanni, hakan na iya zama babban koma baya ga damarsa ta shiga cikin jerin ƴan wasan da za su wakilci Ingila a gasar cin kofin duniya, musamman a wasan da za su kara da Croatia a ranar 17 ga Yuni.
