Masana harkokin lafiyar abinci, sun bayyana amfanin da ganyen zogale ke da shi a jikin Ɗan’adam, sakamakon sinadarin da yake ƙunshe da su.
Har ila yau, bincike ya tabbatar da cewa; zogale yana da matuƙar albarka, domin kuwa ya kan fito har a wurin da babu ruwa.
- Kasar Sin Ta Zama Babbar Kasuwar Da Fim Din “Zootopia 2” Ya Samu Kudi
- Farfesa Gwarzo Ya Gwangwaje Cibiyar Ilimi ‘Alliance Française Kano’ Da Gini Mai Hawa Biyu Na Zamani
Don haka, ganyensa da sassaƙensa; na da matuƙar amfani a jikin mutum. Sannan kuma, yana ɗauke da sinadarin A.B.C.D har ma da E, kana kuma yana ɗauke da sinadarin calcium da potassium, kazalika kuma; mansa yana cikin mayukan da suka fi tsada a duniya.
Kazalika, akwai magunguna 18 da zogale ke yi ga lafiyar Ɗan’adam kamar haka:
-Ana dafa ganyen zogale da zuma a sha kamar shayi, domin maganin Olsa (Ulcer).
-Ana kuma shafa ɗanyen ganyen zogale a kan goshi, don maganin ciwon kai.
-Haka nan, ga wanda ya ji wani rauni ko sara; idan ya shafa ɗanyen ganyen zogale, jinin zai tsaya nan take da izinin Allah.
-Ga mai fama da ƙurajen jiki, sai ya haɗa garin zogale da man zaitun; ya riƙa shawa.
-Ana kuma zuba garin zogale a kan gyambo ko wani rauni, domin ya yi saurin warkewa.
-Sanya garin zogale a cikin abinci, na maganin hawan jini da kuma ƙara wa mutum kuzari,
-Ana dafa ganyen zogale, a saka kanwa ‘yar kaɗan; don maganin shawara.
-Ga mai fama da ciwon ido, zai riƙa ɗiga ruwan ɗanyen zogale; haka nan, shi ma mai fama da ciwon kunne.
-Macen da ke shayarwa kuma, sai ta dafa furen zogale da zuma; domin samun ƙarin yawan ruwan nono.
-Wanda ke fama da yawan fitsari ko ciwon Siga, sai ya riƙa shan furen zogale da citta kamar shayi.
-Kazalika, cin zogalen ma a haka; na maganin tsutsar ciki, musamman ga yara ƙanana.
-Ana daka ganyen zogale da ‘ya’yan ɓaure a sha da nono ko kunu, domin kuwa yana maganin ciwon hanta.
-Ga mai fama da sanyin ƙashi ko wani kumburi, sai ya soya ‘ya’yan zogale ya daka su; ya kuma haɗa da man kwakwa (man- ja) sai ya riƙa shafawa.
-A daka zangarniyar zogale da ‘ya’yan da ke ciki da kaninfari, citta, masoro da kuma kimba, domin ƙarin ƙarfin namiji, sannan yana ƙara wa mata nishaɗi.
-A daka saiwar zogale da ‘ya’yan kankana a sha a nono, yana maganin tsakuwar ciki (Apendis).
-Haka nan, yana maganin typhoid, maleriya, basir da shawara; ta hanyar yawan shan ruwan dafaffen zogale.
-Kazalika, zogale na rage raɗaɗin ciwon HIV ta hanyar shan dafaffen ruwan zogalen.
