An yanke wa wasu maza biyu hukuncin daurin shekaru 24 da watanni biyar gaba daya saboda rawar da suka taka a wani mummunan hadarin mota da ya yi sanadin mutuwar wani dan Nijeriya mazaunin Birtaniya, Sylbester Abayomi, a birnin Manchester.
Wadanda aka samu da laifin, Uways Hussain mai shekaru 20 da Usmon Mahmood mai shekaru 23, an yanke musu hukunci bayan an same su da laifi kan hadarin da ya faru a watan Maris na shekarar 2026 a titin Kingsway da ke Manchester, wanda ya yi sanadin mutuwar Abayomi.
Rahotanni sun nuna cewa Hussain ya samu hukuncin daurin shekaru 11 da watanni takwas, yayin da Mahmood ya samu shekaru 12 da watanni tara a gidan yari.
Sanarwar da ‘yansandan Greater Manchester suka fitar ta bayyana cewa hukuncin Mahmood na daga cikin na farko a Birtaniya inda aka samu wani fasinja da laifin taimakawa da karfafa aikata laifin haddasa mutuwa ta hanyar tuki cikin hadari.
Binciken ‘yansanda ya nuna cewa mutanen biyu sun kwashe daren kafin hadarin suna yawo a Kudancin Manchester cikin ganganci da gudun wuce kima, tare da daukar bidiyon kansu yayin da suke tuki.
‘Yansandan sun ce motar da aka yi hadarin da ita mallakin Mahmood ce, wanda ya ba Hussain damar tuka ta tsawon daren.
An kuma gano daga bidiyon wayoyin hannu da aka kwato cewa su biyun suna tuki da gudun da ya haura mil 100 a awa (100mph) a hanyoyin da iyakar gudu ta kasance mil 30 a awa (30mph).
Bidiyon ya kuma nuna suna karya jan fitilar hanya tare da kutsa kai tsakanin motocin da ke tafiya ba tare da la’akari da lafiyar sauran masu amfani da hanya ba.
Sanarwar ta ce: “Mutanen biyu sun kasance suna tafiya da gudun da ya wuce mil 100 a awa a hanyoyin da aka kayyade mil 30 a awa. A wasu lokuta sun kai gudun sama da mil 130 a awa, kuma dakiku kadan kafin hadarin an rubuta gudunsu ya kai mil 139 a awa.
“A wani lokaci cikin daren, sun tsaya a gidan mai inda bidiyo ya nuna Mahmood yana shakar wani iska daga cikin balan-balan yayin da yake zaune a kujerar fasinja.
“Sauran bidiyon da aka samu sun nuna Mahmood yana shakar iskar daga balan-balan yayin da Hussain ke tuki da gudun sama da mil 100 a awa, inda shi ma Hussain ya bayyana yana yin hakan.”
‘Yansandan sun ce hadarin ya faru da misalin karfe 4:36 na asubahin watan Maris 2026 a mahadar titunan Green End Road da Kingsway.
Marigayin Abayomi na kan hanyarsa ta zuwa aiki ne, kuma ya shiga mahadar ne bayan ya samu koren hasken hanya, yana tunanin yana da lafiya ya wuce. Sai dai wata mota kirar Bolkswagen Golf da Hussain ke tuka wa, wadda ta karya jan fitila cikin matsanancin gudu, ta bugi motarsa.
“Sylbester yana kan hanyarsa ta zuwa aiki kuma ya shiga mahadar ne da koren haske, yana ganin hanya lafiya ce. Daga nan ne motar Bolkswagen Golf da Hussain ke tuka wa ta buge shi bayan ta karya jar fitila cikin tsananin gudu,” in ji ‘yansandan.
Jami’an agajin gaggawa sun garzaya wurin hadarin, amma Abayomi ya rasu sakamakon munanan raunukan da ya samu.
Sanarwar ta kara da cewa bayan hadarin, mutanen biyun sun fara tattauna yadda za su tsere da kuma yadda za su boye wasu hujjoji.
Wani sakon gaggawa da agogon Apple Watch na Hussain ya aika kai tsaye bayan hadarin ya dauki hirarsu, inda aka ji suna tattauna yadda za su gudu daga wurin da kuma irin hujjojin da ya kamata su cire daga motar.
An kuma ji suna tattauna yiwuwar kai rahoton cewa an sace motar. Daga bisani, sun yi odar motar Uber domin tserewa daga wurin.
‘Yansandan Greater Manchester sun ce sun samu rahoton farko da karfe 4:37 na asubahin, kuma cikin mintuna 12 kacal jami’ansu sun gano inda mutanen biyu suke tare da kama su.
Bayanan da aka ciro daga motar Bolkswagen Golf sun tabbatar da cewa motar ta kai gudun mil 139 a awa a dakikun da suka gabaci mummunan hadarin da ya yi sanadin mutuwar Abayomi.
Discussion about this post