A ranar Asabar, 8 ga watan Agustan 2026, al’ummar garin Efeyi Ugboju da ke Ƙaramar Hukumar Otukpo ta Jihar Binuwai sun gudanar da gagarumar jana’izar haɗin gwiwa ga gawarwakin mutane 13 da ake zargin miyagun makiyaya ƴan bindiga ne suka yi musu kisan gilla.
Kamar yadda cikakken rahoton ya tabbatar, wannan mummunan lamari ya faru ne tun a safiyar ranar Talata, 28 ga watan Yuli, 2026, a lokacin da wasu mahara ɗauke da makamai suka kai farmakin bazata a cikin yankin na Efeyi Ugboju, inda suka halaka manoma goma sha uku tare da jefa mazauna garin cikin tashin hankali.
Yayin gudanar da wannan jana’iza mai cike da jimami da baƙin ciki, an sanya gawarwakin mamatan a cikin fararen akwatuna kafin daga bisani a gabatar da addu’o’in ban kwana a gaban ɗimbin ƴan uwa, da abokan arziki, da sauran masu juyayi da suka halarta domin nuna alhinin wannan rashi.
Wani mazaunin Ƙaramar Hukumar Otukpo wanda ya bayyana sunansa da Ebute Samson, ya nuna matuƙar kaico tare da bayyana cewa al’ummar yankin ba ta taɓa fuskantar kisan kiyashi makamancin wannan ba, inda ya kwatanta yadda hawaye suka riƙa kwaranya kamar ruwan kogi a lokacin binne gawarwakin.
Daga ƙarshe, mazauna yankin sun yi kiran gaggawa ga Gwamnatin Tarayya da ta hanzarta kafa barikin sojoji a Kudancin Binuwai domin daƙile irin wannan ta’addanci, yayin da Kakakin Rundunar Ƴansandan Jihar Binuwai, DSP Orchia Peter Aondongu, ya tabbatar da aukuwar wannan asarar rayuka ga manema labarai gabanin gudanar da jana’izar.
