Arsenal ta kammala daukar dan wasan baya na kasar Netherlands, Jurrien Timber daga Ajax kan kudi fam miliyan 34.
Farashin Timber zai iya tashi zuwa £38.5m idan aka hada da ‘yan tsarabe-tsarabe kuma dan wasan mai shekaru 22 ya koma Arsenal kan yarjejeniya mai tsawo.
- Kiwon Lafiya: Yadda Dabi’un Ko-in-kula Ke Yi Wa ‘Yan Nijeriya Kisan Mummuke
- Gwamnan Sakkwato Ya Kafa Kwamitin Da Zai Binciki Tambuwal
Zai kara karfafa tsaron Arsenal bayan dan wasan baya William Saliba ya amince da sabon kwantiragin shekaru hudu.
Kocin Arsenal Mikel Arteta, ya ce “Muna matukar farin ciki da Jurrien ya iske mu, shi din hazikin matashin mai tsaron baya ne.”
Jurrien matashin dan wasa ne, amma ya riga ya samu nasarori masu yawa,ya buga babbar gasa ta kasa da kasa fiye da sau daya.
Da kuma kofunan da ya lashe tare da Ajax. Muna fatan za a yi maraba da shigar da Jurrien cikin tawagarmu.
Ya buga wa Netherlands wasanni 15, ciki har da hudu a gasar cin kofin duniya da aka buga a Qatar, inda ya taimakawa tawagar Louis van Gaal ta kai wasan daf da na kusa da karshe.
Timber ya ce ya kasance mai sha’awar Arsenal a koyaushe wanda ya samo asali ne daga kaunar da yan uwansa ke nuna wa kulob din.
Timber ya ce ya kasance magoyin bayan Arsenal kullum, kuma ina son ganin Arsenal tana taka leda, suna da manyan yan wasa, yadda suke taka leda abin na burgeni.
Ina son kallon tsoffin yan wasan kungiyar Robin van Persie, da Thierry Henry Su ne yan wasan da na fi so inji shi.
Timber zai kara karfi ga bayan kungiyar Arsenal wadda ta zo ta biyu ga Manchester City a gasar cin kofin Premier da suka fafata a kakar da ta wuce.
Kuma ta samu gurbin shiga gasar cin kofin zakarun Turai bayan shafe shekaru shida ba tare da sun shiga ba.
Timber ya buga wasanni 47 a dukkan gasannin da ya bugawa Ajax a kakar wasan da ta wuce,kuma ya taimakawa kungiyar Amsterdam ta lashe kofin Eredivisie a 2021 da 2022.
