Magoya bayan tawagar ƙwallon ƙafa ta Argentina na cikin fargaba bayan kyaftin ɗin ƙasar, Lionel Messi, ya ji rauni a wasan da Inter Miami CF ta doke Philadelphia Union da ci 6-4 ranar Lahadi.
Tauraron mai shekaru 38 ya nemi a maye gurbinsa a minti na 73 bayan ya riƙe bayan ƙafarsa ta hagu, lamarin da ya janyo damuwa ga magoya bayan Argentina masu fatan ganin ya kasance cikin ƙoshin lafiya domin taimakawa ƙasar kare kambunta na FIFA World Cup.
Kocin Inter Miami, Guillermo Hoyos, ya bayyana cewa cire Messi daga wasan mataki ne na kariya domin gujewa tsanantar rauni. Ya kuma ce rashin kyawun yanayin filin wasa ya taimaka wajen janyo gajiya ga ɗan wasan.
Duk da fargabar da ake yi, an hangi Lionel Messi yana tafiya da kansa zuwa ɗakin canja kaya ba tare da taimakon likitoci ba. Har yanzu babu tabbacin ko zai buga wasannin sada zumunta da Argentina za ta yi da Honduras da Iceland a wata mai zuwa.
Ko da yake Messi bai tabbatar da cewa zai buga gasar kofin duniya mai zuwa ba, ana sa ran zai shiga tawagar Argentina domin kafa tarihi da buga gasar karo na shida a rayuwarsa.
