Wani fitaccen dan jaridar Nijeriya na ƙasa da ƙasa kuma tsohon ma’aikacin shashin Hausa na Voice of America (VOA), Saleh Shehu Ashaka, ya rasu a ƙasar Egypt bayan fama da jinya mai tsawo. Ya rasu ne a ranar Lahadi, 3 ga Mayu, 2026, a birnin Cairo, inda yake karɓar magani kafin rasuwarsa.
An tabbatar da rasuwarsa ne ta hannun tsohon Ministan Sadarwa da Tattalin Arzikin Dijital, Isa Ali Pantami, cikin wata sanarwa da ya wallafa a shafinsa na X, inda ya bayyana cewa marigayin ya daɗe yana fama da rashin lafiya.
Pantami ya ce rasuwar Ashaka babban rashi ne ga matasan Nijeriya, yana mai tuna irin gudunmawar da ya bayar a fannin yaɗa labarai. Ya kuma yi addu’ar Allah ya ji ƙansa da rahama tare da sanya shi a Aljannatul Firdausi, tare da mika sakon ta’aziyya ga iyalansa da abokansa.
Marigayin ya shafe shekaru masu yawa yana aiki a harkar jarida, inda ya yi suna a matsayin wakilin VOA Hausa da ke aiki daga Abuja, yana ruwaito muhimman al’amuran ƙasa. Ya samu karɓuwa a duniya musamman a shekarar 2017 lokacin da jami’an tsaron Amurka suka tsare shi tare da yi masa tambayoyi a wani filin jirgin sama a farkon mulkin Donald Trump.
Baya ga wannan lamari, an san shi da ƙwarewa wajen ruwaito rahotannin siyasa da harkokin tsaro a Nijeriya, inda ya gina suna a kafafen yaɗa labarai na gida da na duniya. Marigayin ya bar mata biyu da yaro ɗaya.
Discussion about this post