Wani ɗan takarar shugaban ƙasa a ƙarƙashin jam’iyyar Peoples Democratic Party (PDP), Dr. Gbenga Hashim, ya soki yadda tattalin arzikin Nijeriya ke tafiya a ƙarƙashin Shugaba Bola Ahmed Tinubu, yana mai cewa tattalin arzikin ƙasar ya fi rauni a yau idan aka kwatanta da lokacin mulkin tsofaffin shugabanni, musamman Olusegun Obasanjo da Goodluck Jonathan.
Hashim ya bayyana hakan ne a ranar Laraba yayin wata tattaunawa kai tsaye a tashar Channels Television tare da Seun Okinbaloye, inda suka tattauna kan makomar tattalin arzikin Najeriya da kuma rawar da matasan Najeriya ke takawa a tattalin arzikin duniya, a shirin Politics Today.
- Kotun Amurka Ta Yanke Wa Wanda Yayi Yunƙurin Kashe Trump Hukuncin Ɗaurin Rai Da Rai
- INEC Ta Amince Da Shugabancin PDP Tsagin Wike
Ya ce bayanan tattalin arziki na hukuma sun nuna cewa tsare-tsaren kuɗi da na kasafin kuɗi na gwamnatocin jam’iyyar APC a cikin shekaru goma da suka gabata sun gaza tafiya daidai da karuwar yawan jama’a da buƙatun ci gaba.
“GDP a zamanin Obasanjo ya kai kusan dala biliyan 267. A zamanin Jonathan kuwa ya tashi zuwa sama da dala biliyan 574. Amma a yau, a ƙarƙashin Tinubu, ya faɗi zuwa kusan dala biliyan 230. Wannan koma baya ne mai tayar da hankali ga ƙasa mai yalwar albarkatun ɗan Adam da na ƙasa,” in ji Hashim.
Ɗan takarar na PDP ya kuma nuna damuwa kan faduwar darajar naira, yana mai cewa darajar da take da ita a halin yanzu ta yi ƙasa ƙwarai da abin da ya dace da tushen tattalin arzikin Najeriya. Ya ce hakan ya ƙara tsadar rayuwa tare da raunana gwiwar masu zuba jari.
Hashim, wanda shi ma ɗan kasuwa ne a matakin duniya, ya kuma tambayi irin gudunmawar da Shugaba Tinubu ya bayar wajen ci gaban jihar Lagos, yana kwatanta ta da ta tsohon shugaban soja, Janar Ibrahim Babangida (IBB). Ya ce Babangida ya fi bayar da gudunmawa mai ɗorewa ta hanyar gina Gadar Third Mainland.
“IBB ya fi ba da gudunmawa ga ci gaban Lagos saboda shi ne ya gina Gadar Third Mainland. Idan ka cire wannan gada a yau, me ya rage? Ƙaramar gadar Lekki da Tinubu ya gina kuma ya sanya kuɗin wucewa ba ta kai Third Mainland da IBB ya gina ba,” in ji Hashim.
Ya kuma yi watsi da jam’iyyar Action Democratic Congress (ADC) a matsayin wata sahihiyar madadin siyasa, yana cewa da dama daga cikin mambobinta suna da alaƙa da matsalolin tsaro da tattalin arziki da ƙasar ke fuskanta.
“Baya ga Peter Obi da watakila Atiku Abubakar, yawancin sauran ’yan ADC Buharawa ne da ake zargi da kasancewa cikin matsalar da muke ciki a yau,” in ji shi.
Hashim ya kalubalanci mambobin tawagar kula da tattalin arzikin gwamnatin Tinubu, ciki har da Gwamnan Babban Bankin Najeriya (CBN) da Ministan Kuɗi, da su fito fili su kare ayyukansu a muhawarar kai tsaye.
“Kalubale ne a fili — su fito da ƙwararrunsu, gwamnan CBN da ministan kuɗi, mu yi muhawara kai tsaye kan tattalin arziki,” in ji shi.
Yana mai jaddada cewa an rage darajar naira fiye da kima, Hashim ya ce karin yawan man fetur da ake samarwa daga kusan ganga 900,000 a rana zuwa kusan ganga miliyan 1.8, tare da raguwar shigo da man fetur sakamakon ƙarin tacewa a cikin gida, ya kamata su taimaka wajen ƙarfafa darajar naira, ba wai ta ci gaba da faduwa ba idan aka kwatanta da zamanin mulkin Buhari.
Discussion about this post