Muaaddashin Shugaban Hukumar da ake shirin kafa ta National Institute for Public Health and Infectious Diseases (NIPHID) da ke Zariya, Dakta Dalhatu Abdullahi Aminu, ya ce adawar da NCDC, Nigerian Infectious Diseases Society (NIDS) da Health Sector Reform Coalition (HSRC) ke yi wa ƙudirin dokar ta samo asali ne daga rashin fahimtar abin da ƙudirin ya ƙunsa.
Ya bayyana cewa ƙudirin, wanda Kakakin Majalisar Wakilai Abbas Tajudeen ya ɗauki nauyi, ba zai maimaita ayyukan NCDC ba. A cewarsa, NIPHID za ta mayar da hankali ne kan kula da masu cututtuka masu yaɗuwa, horas da ƙwararru da gudanar da bincike, tare da yin aiki tare da NCDC wajen horo da bincike.
Aminu ya ce ƙudirin ya haramta wa cibiyar gudanar da ayyukan sa ido kan cututtuka, jagorantar yaƙi da ɓarkewar annoba ko kula da tsarin ƙasa, waɗanda ke ƙarƙashin NCDC. Ya kuma ƙaryata zargin cewa cibiyar za ta zama cibiyar tuntuba ta IHR ko ta kafa ofisoshi a dukkan shiyyoyin ƙasa.
Ya bayyana cewa NIPHID za ta gaji cibiyar horas da masu yaki da tarin fuka da kuturta ta Zariya, tare da ma’aikatanta da kayayyakin aikinta, ba tare da kafa sabuwar babbar hukuma ba.
Daga ƙarshe, Aminu ya buƙaci NCDC da sauran masu adawa su sake nazarin sahihin ƙudirin dokar, su janye adawarsu, sannan su yi haɗin gwiwa domin inganta tsarin kiwon lafiyar Nijeriya.
