Gwamnan Jihar Neja, Mohammed Umaru Bago, ya karɓi tsoffin mambobin PDP a Agaie. Mambobin sun sauya sheƙa zuwa jam’iyyar APC.
Bago ya tarɓe su a shalƙwatar ƙaramar hukumar Agaie a ƙarshen mako. Ya taya su murna tare da tabbatar musu da daidaito a cikin jam’iyya.
- Gwamna Bago Ya Gargadi ‘Yan APC Masu Yi Wa Jam’iyyar Zagon Kasa
- Gwamna Bago, Ya Sha Alwashin Murƙushe ‘Yan Bindiga Da Masu Ba Su Bayanai
Ya jaddada cewa APC jam’iyya ce ta haɗin kai da zaman lafiya. Ya buƙace su su taka rawa wajen ƙarfafa wannan manufa.
Gwamnan ya gargaɗi mambobi da su guji tashin hankali wajen nuna rashin jituwa. Ya buƙace su su yi amfani da zaɓen fidda gwani wajen zaɓar ‘yan takara.
A madadin masu sauya sheƙa, Alhaji Abdulkadir Agaie ya bayyana dalilinsu. Ya ce manufofi da tsare-tsaren Bago ne suka ja hankalinsu.
Ya ƙara da cewa shirye-shiryen gwamnati na tallafa wa jama’a na daga cikin abin da ya rinjaye su. Hakan ya sa suka yanke shawarar shiga APC.
Abdulkadir ya gode da yadda aka tarɓe su cikin mutunci da girmamawa. Ya kuma yi alƙawarin yi wa APC aiki a zaɓe mai zuwa.
