Gwamnatin Jihar Kaduna ta sanar da tsawaita Shirin Sufurin Motocin CNG kyauta ba tare da kakkautawa ba, sakamakon tasirin da shirin ya yi wa mazauna jihar na jigilarsu daga wurare dadan-daban.
A wata sanarwa da Kwamishinan Yaɗa Labarai na jihar Kaduna Malam Ahmed Maiyaki, ya fitar a ranar Juma’a, ya ce Gwamna Uba Sani ya amince da tsawaita shirin ne bayan duba rahoton na da ya samu game da yadda shirin ya gudana daga watan yuni zuwa Nuwamba 2025.
- An Yi Barazanar Kashe Ni Bayan Komawa Manchester United – Rooney
- Me Ya Sa Ya Kamata Kasashen Afirka Su Bunkasa Tattalin Arziki Tare Da Kare Muhalli?
A cewar sanarwar, manyan motocin CNG guda 100 da tashoshi 200 da ake amfani da su a fadin jihar sun ɗauki fasinjoji sama da miliyan 1.4 cikin watanni biyar, tare da adana wa al’ummar jihar Kaduna kimanin Naira biliyan 1.39 a kudin sufuri.
“Wadannan ba lissafi kawai ba ne, Sun zama kudin makaranta da aka biya, abincin da ya shiga kima da kananan kasuwanni da suka ci gaba da aiki, da dubban ‘yan jihar da ke zirga-zirga ba tare da nauyin kudin mota ba.”
Ya kara da cewa shirin yana bawa sama da mutane 18,000 hidima a kullum, lamarin da ya tabbatar da mahimmancinsa a matsayin daya daga cikin fitattun shirye-shiryen tallafin jin kai a jihar.
Maiyaki ya bayyana cewa Gwamna Uba Sani, wanda ya tausaya matuka bayan jin shaidun fasinjoji a lokacin ziyarce-ziyarcen sa, ya umarci ci gaba da gudanar da shirin ba tare da saka wa’adin karewa ba.
“Jin dadin jama’armu da murmushinsu, da godiyar da suke yi suna tuna mana cewa shugabanci dole ne ya rage wa talaka nauyi,” in ji Gwamnan.
“Saboda haka na amince da ci gaba da gudanar da Shirin Sufurin Jama’a na CNG kyauta har sai wani lokaci .”
Kwamishinan ya kara tabbatar da cewa gwamnatin ta jajirce wajen fadada sufuri mai aminci, da rahasu kuma mai kare muhalli ga dukkan mazauna jihar, a matsayin wani bangare na kudurin bunkasa jarin dan adam.
