Gwamnan Jihar Kaduna, Uba Sani ya yi bayanin dalilin da ya sanya gwamnatin jihar ta yanke shawarar tattaunawa da ‘yan bindiga, ya ce, hakan ya fi kan a yi ta asarar rayuka.
A cewar gwamnatin, iyalan wadanda abin ya shafa ne kawai za su fi fahimta matakin yadda ya kamata har ma su yi godiya kan dalilin da ya sa gwamnati ta dauki wannan mataki mai muhimmanci.
- Gwamnatin Tarayya Ta Gargaɗi Jama’a Kan Ajiye Abubuwa Masu Fashewa Don Haƙar Ma’adanai Ba Bisa ƙa’ida Ba
- Gwamnatin Katsina Ta Fitar Da Naira Miliyan Dubu 50 Domin Samar Da Ruwan Sha
Gwamnan a hirarsa da sashin Hausa na BBC wanda wakilinmu ya bibiya, Gwamna Sani ya yi karin haske kan dalilan da suka sanya gwamnatinsa ta zabi sulhu na zaman lafiya da ‘yan bindiga da suka addabi wasu yankunan jihar.
LEADERSHIP Hausa ta labarto cewa Jihar Kaduna dai na ci gaba da fama da hare-haren ‘yan bindiga a wasu kauyuka, musamman a cikin kananan hukumomin Chikun, Kagarko, Giwa, Kajuru, da Birnin Gwari, kari kan yawan kai farmaki manyan hanyoyi da yin garkuwa da mutane lamarin da ke janyo asarar rayuka da dimbin dukiya.
Gwamnan ya ce, “Mutanen da lamarin ta’addancin ya shafa sun yi kira ga a yi sulhun. A misali, Sarkin Birnin Gwari ya yi kira da irin wannan sulhun.
“Da na tambaye shi dalili, sai ya ce al’ummominmu suna fama da barnar ‘yan bindiga da hakan ke janyo asarar rayuka da garkuwa da mutanenmu tsawon shekaru zuwa yanzu ba tare da samun mafita da shawo kan lamarin ba.”
Gwamnan ya ce bayan rokon, ya zauna da masu ruwa da tsaki ciki har da mashawarcin shugaban kasa kan harkokin tsaro, Nuhu Ribadu, kafin daga karshe suka amince da fito da shirin yin sulhun.
Ya kara da cewa matakin na zuwa ne bayan da ‘yan fashin dajin suka sako mutane 200 da suka yi garkuwa da su a kananan hukumomin Giwa da Birnin Gwari. Gwamnan ya nuna fatansa na cewa matakin zai dawo da zaman lafiya da kwanciyar hankali a jihar ta yadda manoma za su sami damar komawa gonakansu domin yin noma da kuma dawo da harkokin kasuwanci yadda ya kamata.
“Gara na yi sulhu da ‘yan bindiga da ran mutum daya ya salwanta. Idan ba haka ba, ni ne zan je gaban Allah na yi bayanin wannan rasa ran domin na rantse cewa zan kare rayukan mutane,” ya shaida.
Kazalika, ita ma kungiyar Dattawan Arewa (ACF), ta shelanta cikakken goyon bayanta ga matakin Gwamna Uba Sani na yin sulhu da zaman lafiya da ‘yan bindigan a Kaduna da ma yankunanta.
A hirar da ya yi ta wayar salula da LEADERSHIP, jami’in watsa labarai na kungiyar ACF, Farfesa T.A Muhammad Baba, ya ce kungiyar ta yi maraba da yunkurin gwamnan na kawo karshen garkuwa da mutane da aikace-aikacen ‘yan fashin daji.
