Hukumar ɗaba’i da tace fina-finai ta Jihar Kano (KTHMB) ta rufe wani shagon sayar da magungunan gargajiya mai suna “Baban Sadik” da ke unguwar Na’ibawa a ƙaramar hukumar Kumbotso.
Kamar yadda rahoton Daily Trust ya tabbatar, an gudanar da sumamen ne ƙarƙashin jagorancin Darakta Janar na hukumar, Babban Likita Usman Tukur Aliyu, a yunkurin kawo ƙarshen tallace-tallacen da masu shagon ke yi a kafar sadarwa ta TikTok.
Babban Likita Aliyu ya bayyana cewa masu shagon suna yaɗa bidiyoyin batsa da kalmomin lafazi na wulakanci da suka saɓa wa ƙa’idojin addini, da al’ada, da kuma dokokin aikin likitancin gargajiya na jihar Kano.
Hukumar ta kuma kama wasu ma’aikatan shagon guda uku tare da sauran kayayyakin magani yayin gudanar da sumamen, inda aka miƙa su ga rundunar ‘yansanda domin gudanar da bincike mai zurfi tare da ɗaukar matakin shari’a.
Shugaban hukumar ya sake jaddada gargaɗi ga dukkan masu sana’ar magungunan gargajiya a jihar da su bi ƙa’idojin da aka gindaya, yana mai cewa gwamnati ba za ta amince da kowane irin saɓa doka ko gurbata tarbiyyar al’umma ba.
