Gwamnatin Tarayya ta ayyana ranar Talata, 25 ga watan Agusta, 2026, a matsayin ranar hutun gwamnati domin gudanar da bikin murnar zagayowar ranar haihuwar fiyayyen halitta, Annabi Muhammadu (S.A.W) wato bikin Eid-ul-Mawlid.
Wannan sanarwar tana ƙunshe ne a cikin wata takarda da Ministan Harkokin Cikin Gida ya fitar, inda ya taya ɗaukacin al’ummar Musulmai na Nijeriya da ma duniya baki ɗaya murnar wannan rana mai tarin albarka. Ya buƙaci Musulmai da su yi koyi da kyawawan ɗabi’un fiyayyen halitta na haƙuri, da juriya, da son zaman lafiya, da kuma tausayi a cikin dukkanin al’amuransu.
Haka kuma, Ministan ya yi amfani da wannan dama wajen yin kira ga ‘yan Nijeriya, ba tare da la’akari da addini ko ƙabila ba, da su yi amfani da wannan hutu domin gudanar da addu’o’i na musamman don samun dawwamammen zaman lafiya, da cigaba, da kuma ci ƙaruwar tattalin arziƙin ƙasar nan.
Daga ƙarshe, ya jaddada aniyar gwamnati mai ci ƙarƙashin jagorancin Shugaba Bola Ahmed Tinubu na ci gaba da gudanar da tsare-tsare masu inganci da za su ciyar da ƙasar nan gaba tare da kare hakkoki da walwalar kowane ɗan ƙasa, inda ya yi fatan a gudanar da bukukuwan lafiya.
