Gwamnatin Tarayya ta haramta wa waɗanda aka ba digirin girmamawa (honorary degree) amfani da laƙabin “Dr” a sunayensu, a wani mataki na daidaita ƙa’idojin ilimi a ƙasar.
Ministan Ilimi, Tunji Alausa, ne ya sanar da hakan yayin taron manema labarai da aka gudanar a fadar shugaban ƙasa da ke Abuja a ranar Laraba.
Ya bayyana cewa an ɗauki wannan mataki ne a zaman Majalisar Zartarwa ta Tarayya (FEC) da aka gudanar a ranar 30 ga Afrilu, inda aka amince da sabbin tsare-tsaren da suka shafi martabar takardun ilimi da yadda ake amfani da su.
Gwamnatin ta jaddada cewa laƙabin “Dr” ya kamata ya kasance ga waɗanda suka samu digirin digirgir (PhD) ta hanyar cikakken karatu da bincike, ba wai digirin girmamawa kawai ba.
Masana harkar ilimi na ganin cewa wannan mataki zai taimaka wajen kare darajar ilimi da hana ruɗani a tsakanin al’umma dangane da cancantar masu riƙe da laƙabin digirgir.
