Gwamnatin tarayya ta amince da sabbin matakan manufofin kasafin kuɗi na 2026, inda ta rage harajin shigo da kaya a fannoni daban-daban na tattalin arziƙi, ciki har da shinkafa da motoci.
A wata sanarwa da Ministan Kudi kuma mai kula da tattalin arziƙi, Wale Edun, ya sanya wa hannu, an bayyana cewa matakan sun maye gurbin na shekarar 2023, tare da duba jimillar layukan haraji 127 domin ƙarfafa bunƙasar tattalin arziƙi.
- Yadda Shigo Da Shinkafa Daga Kasashen Waje Ya Share Masana’antu 90 A Nijeriya
- Ma’aikatan NPA Wasu Ginshikai Ne Na Ciyar Da NPA Gaba —Dantsoho
Sabon tsarin ya nuna cewa harajin shigo da motocin fasinja ya ragu daga kashi 70 zuwa kashi 40, yayin da shinkafa mai yawa ko wadda ta haura kilo 5 za ta biya kashi 47.5 maimakon kashi 70 da ake biya a baya. Haka kuma, an rage harajin man dabino zuwa kashi 28.75 daga kashi 35.
Gwamnatin ta kuma bai wa masu shigo da kaya wa’adin kwanaki 90 domin su fitar da hajojinsu da tsohon tsarin haraji idan sun riga sun buɗe takardar Form ‘M’ kafin ranar 1 ga Afrilu, yayin da za a fara aiwatar da sabon tsarin harajin da kuma ƙarin “green tax” daga ranar 1 ga Yuli, 2026.
Bugu da ƙari, wasu kayayyaki kamar injinan noma da masana’antu, da jiragen ruwa, da wasu na’urorin lafiya za su samu rangwamen haraji gaba ɗaya, yayin da gwamnati ta ce matakan na nufin rage tsadar rayuwa, da ƙarfafa masana’antu da kuma bunƙasa tattalin arziƙin ƙasa baki ɗaya.
