Babbar Kotun Tarayya da ke Abuja ta bai wa ɗan gwagwarmaya kuma mai sharhi a kafofin sada zumunta, Justice Chidiebere, wanda aka fi sani da Justice Crack, beli kan zargin aikata laifukan intanet.
Mai shari’a Joyce Abdulmalik ta bayar da belin ne kan kuɗi Naira miliyan 5 tare da mutum ɗaya da zai tsaya masa da makamancin wannan adadi.
Kotun ta ce wanda zai tsaya masa dole ne ya kasance yana zaune a yankin da kotun ke da iko a kai tsawon aƙalla shekaru huɗu tare da tabbataccen adireshi, sannan ya gabatar da shaidar zama kamar yarjejeniyar haya ko takardar mallakar gida ga ma’ajiyar kotu.
Mai shari’ar ta kuma bayyana cewa wanda zai tsaya masa dole ne ya kasance ma’aikacin gwamnatin tarayya mai mataki na 15 ko sama da haka, tare da shaidar albashin aƙalla watanni uku, wasiƙar tabbatarwa daga shugaban sashensa da kuma shaidar fansho.
Wani shaida ya bayyana wa kotu cewa wanda ake tuhuma ya bayar da bayaninsa da kansa a gaban lauyoyinsa.
A cewarsa, wasu sojoji ne suka aika wa wanda ake tuhuma hotuna, sannan ya yi bidiyo daga hotunan tare da wallafa su a kafofin sada zumunta ba tare da tabbatar da sahihancinsu daga hukumomin soja ba.
Ya kuma shaida wa kotu cewa masu bincike sun cire bayanai daga wayar wanda ake tuhuma, ciki har da bidiyoyin da ake zargin ya wallafa a intanet, tattaunawarsa da wasu sojoji, saƙonnin da ya yi da wanda ya kira “uban gidansa” kan zanga-zanga, da kuma bayanai daga shafukansa na sada zumunta.
Shaidar ya ƙara da cewa an fitar da takardar tabbatar da bin ƙa’ida kuma wani babban jami’i ya sanya wa hannu bayan kammala binciken fasaha.
A yayin zaman kotun, lauyan kariya, Sam Amadi, ya sanar da kotun cewa ba a ba su rahoton binciken da sauran takardun da masu gabatar da ƙara ke son gabatarwa ba.
Sai dai masu gabatar da ƙarar sun bayyana hakan a matsayin kuskure tare da bayar da haƙuri a gaban kotu.
Daga nan ne Mai shari’a Abdulmalik ta amince da rahoton binciken DSS a matsayin hujja ta Eɗhibit A.
Masu gabatar da ƙarar sun kuma gabatar da wayar iPhone da ake zargin an ƙwato daga hannun wanda ake tuhuma, da flash driɓe da aka ce na ɗauke da bidiyoyin da aka wallafa a kafofin sada zumunta, tattaunawar da aka cire daga wayar, da kuma takardar tabbatar da bin ƙa’ida.
Lauyoyin kariya sun ƙi amincewa da karɓar flash driɓe ɗin a matsayin hujja, suna masu cewa ba a bayyana abin da ke cikinsa ba kuma ba a kunna shi a gaban kotu ba.
An ɗage sauraron ƙarar zuwa ranar 25 ga Mayu domin ci gaba da shari’ar, yayin da har yanzu ba a sallami shaidar farko ta masu gabatar da ƙara ba.
Jaridar PUNCH Metro ta rawaito cewa sauraron neman belin ya tsaya a ranar 14 ga Mayu bayan saɓani ya ɓarke tsakanin lauyoyin wanda ake tuhuma kan wanda zai jagoranci tawagar kariya.
Saɓanin ya janyo janye wata tsohuwar buƙatar beli da aka gabatar a madadin ɗan gwagwarmayar, lamarin da ya tilasta wa kotun ɗage shari’ar zuwa ranar Litinin domin sauraron sabuwar buƙatar beli.
Discussion about this post