Aƙalla manoma da masu kiwon dabbobi 200 ne suka amfana da shirin Sustainable Peace and Resilience (SPAR) a jihar Katsina, wani tsari da aka ƙaddamar domin inganta zaman lafiya da ƙarfafa hanyoyin samun abin dogaro ta hanyar noma mai dacewa da sauyin yanayi.
Manajan aikin na Women Environmental Programme, Damaris Uja, ta bayyana hakan yayin taron rufe aikin da bitar darussa, inda ta yi bayani kan tasirin shirin a al’ummomin da suka ci gajiyarsa.
Ta ce shirin, wanda Foreign, Commonwealth and Development Office ke tallafawa tare da haɗin gwuiwar ActionAid da Tetra Tech, an ƙirƙire shi ne domin magance tushen rikice-rikicen manoma da makiyaya tare da inganta juriya ta tattalin arziki.
A cewarta, an zaɓi masu cin gajiyar kai tsaye 200 daga jihohin Katsina da Binuwe, inda kowace jiha ta bayar da manoma 50 da makiyaya 50, yayin da wasu da dama suka amfana a daga gefe.
Shirin ya haɗa da horo kan kiwon dabbobi mai ɗorewa da noma mai jure sauyin yanayi, tare da samar da ƙaramar Ruga da aquaponics domin ƙara hanyoyin samun kuɗi da inganta wadatar abinci.
Haka kuma, an jaddada muhimmancin haɗa mata da masu nakasa cikin shirin, yayin da aka gudanar da wayar da kai da ziyarce-ziyarcen shawarwari ga gwamnati da sarakunan gargajiya domin tabbatar da dorewar shirin.
A nasa ɓangaren, jagoran shirin SPRING, Ukona Ukiwo, ya bayyana cewa haɗa batun sauyin yanayi da rikicin manoma da makiyaya yana da muhimmanci, yana mai cewa shirin ya taimaka wajen ƙarfafa hanyoyin warware rikici da gina juriya a tsakanin al’umma.
Ya ƙara da cewa tun fara shirin a 2024, an yi aiki da hukumomi da al’umma domin ƙarfafa tsarin gargaɗi da matakan magance rikice-rikice, tare da tallafa wa manufofi da dokoki da ke inganta sarrafa albarkatu da zaman lafiya.
Discussion about this post