Fadar shugaban kasa ta ce babu wanda zai iya ikirarin cewa shi ne ke da alhakin nasarar zaben shugaban kasa Muhammadu Buhari a 2015.
Fadar tayi wannan martanin ne yayin da jigo a jam’iyyar APC kuma Dan takarar shugaban kasa a Jam’iyyar a 2023, Asiwaju Bola Tinubu, ya ce in ba don shi ba, da Shugaba Buhari bai ci zaben shugaban kasa a 2015 ba.
Tinubu yayi magana ne a ranar Alhamis din da ta gabata a wani taro da wakilan jam’iyyar APC a jihar Ogun.
Tinubu ya yi magana kan yadda ya mika Yemi Osinbajo a matsayin mataimakin shugaban kasa, a lokacin da aka nuna adawa da kin amincewa ayi takarar Muslim-Muslim (Shugaban kasa musulmi Kuma mataimaki musulmi) a jam’iyyar APC.
Sai dai mai magana da yawun shugaban kasa, Garba Shehu, a wata sanarwa da ya fitar a ranar Litinin, ya ce watakila ba abin mamaki ba ne a jajibirin zaben fidda gwani na jam’iyyar APC akwai wadanda suka yi tsayin daka wajen ganin an lashe zaben, shekaru bakwai da suka wuce.
