Duk da irin ɗimbin albarkar da ke tattare da fannin noman ƙasar nan, har yanzu a ƙasar, akwai bangaren da ƴan ƙasar, ba su mayar da hankali a kai ba, musamman ma bangaren kiwo.
Wasu daga cikin fannin sun haɗa da kiown Awaki, musamman duba da irin alfanun da fannin yake da shi, wanda idan da matasan ƙasar sun rungume shi, da sun riƙa samarwa da kansu kuɗaɗen shiga.
Ga duk waɗanda suka rungumi kiwon Awakii, a duk shekara za su iya samun kuɗaɗen shiga.
Kazalika, idan sun yanka su, za su iya sayar da fatunsu, domin samun kuɗin shigar, da za su ɗauki ɗawainiyar gidajensu.
A nan, ga jerin dalilan da ya kamata jama’a su rungumi fannin na kiown Awaki kamar haka:
Waɗanda Za Su Fara Yin Kiwon Ba Sai Sun Tanadi Kuɗaɗe Masu Yawa Ba:
Idan aka kwatanta da sauran kiwon dabbobi, kiwon Awaki ya fi sauƙi, wanda ya fi dacewa mutane su yi, musamman waɗanda ba su da wadatattun kuɗaɗen fara yin kiwo.
Ana buƙatar a iya yin kiwonsu a yanayi mai kyau, domin suna da buƙatar wadataccen wajen kiwo, wanda hakan ke nuna cewa; inda ake kiwata su zai yi wuya a kiwata Shanu.
Suna Haihuwar Ƴaƴa Da Yawa:
Suna haihuwar ƴaƴan, da suka fi na Saniya yawa, inda sukan haifi, ƴaƴa daga 6 zuwa 8, a duk wata.
Ba sai masu kiwonsu sun jima suke fara samun kuɗaɗen shiga ba, saboda saurin haihuwarsu.
Ba A Shan Wuya Wajen Ciyar Da Su:
Akasari, sun fi cin Ciyawa da sauran abincin da ba kasafai sauran dabbobi za su iya ci ba.
Kazalika, garkuwar da ke a jikinsu na kare su daga saurin kamuwa da cututtuka, amma duk da hakan, ana buƙatar masu kiwata su, su riƙa ci gaba da kula da lafiyarsu a-kai-a-kai tare da ba su kulawar da ta dace.
Ana Samun Ƙarancisu:
Matasan ƙasar nan da suka rungumi kiwonsu, na samun nasara a yayin sayar da su, wanda hakan zai ba su damar samarwa kansu kuɗaɗen shiga masu yawan gaske.
