NPA Da Birtaniya Sun Kulla Yarjejeniyar Zamanantar Da Tashoshin Jiragen Ruwan Nijeriya

Hukumar Tashoshin Jiragen Ruwa ta Nijeriya (NPA) da Birtaniya sun sake tabbatar da aniyarsu ta kara karfafa hadin gwiwa a harkokin ruwa, tare da mayar da hankali kan binciken taswirar ruwa, tsaron zirga-zirgar jiragen ruwa, bunkasa tashoshin jiragen ruwa da kuma gina kwarewar ma’aikata.

Hakan ya biyo bayan wata ziyarar girmamawa da Mataimakin Babban Kwamishinan Birtaniya a Nijeriya, Jonny Badter, Babban Jami’in Hydrographer na Birtaniya, Angus Essenhigh, da jami’an Ofishin Hydrographic na Birtaniya (UKHO) suka kai wa Manajan Daraktan NPA.

Tawagar ta samu tarba daga Manajan Daraktan NPA, Abubakar Dantsoho, tare da Daraktan Zartarwa mai kula da Injiniya da Ayyukan Fasaha da sauran manyan jami’an hukumar.

A yayin ganawar, bangarorin biyu sun tattauna hanyoyin kara karfafa dadaddiyar hadin gwiwar da ke tsakanin Nijeriya da Birtaniya a harkokin ruwa, musamman a fannoni masu muhimmanci ga tsaron zirga-zirga a ruwa, ingancin ayyukan tashoshin jiragen ruwa da kuma ci gaba mai dorewa a fannin.

Da yake jawabi, Dantsoho ya bayyana shirye-shiryen zamanantar da tashoshin jiragen ruwa da NPA ke aiwatarwa domin mayar da tashoshin Nijeriya cibiyoyin kasuwanci masu gogayya a duniya.

LABARAI MASU NASABA

Dalilin Da Ya Sa Matatar Dangote Ta Kara Habaka Tura Man Fetur

Kwamitin Majalisa Ya Kwato Naira Miliyan 521.76 Na VAT Daga CBN

Ya bayyana cewa hukumar na zuba jari a manyan ayyuka da suka hada da gyaran tashoshin jiragen ruwa, inganta hanyoyin ruwa da kuma sabunta muhimman kayayyakin more rayuwa domin kara ingancin aiki, rage lokacin da jiragen ruwa ke dauka a tashoshi da kuma karfafa matsayin Nijeriya a kasuwancin ruwa na yanki da na duniya.

Tattaunawar ta kuma mayar da hankali kan bunkasa kwarewar binciken taswirar ruwa domin inganta tsaro a zirga-zirgar ruwa da kuma saukaka ayyukan tashoshin jiragen ruwa a hanyoyin ruwan Nijeriya.

Tawagar Birtaniya ta sake jaddada aniyarta ta tallafa wa ci gaban wannan fanni a Nijeriya ta hanyar hadin gwiwar fasaha da musayar ilimi.

Ganawar ta sake nuna kakkarfan dangantakar diflomasiyya da ke tsakanin Nijeriya da Birtaniya, da kuma jajircewarsu wajen bunkasa kirkire-kirkire, habaka kwarewa da ci gaba mai dorewa a masana’antar harkokin ruwa.