Dan wasan gaban tawagar Super Eagles ta Nijeriya, Victor Osimhen dake taka leda a kungiyar kwallon kafa ta Galatasaray ya lashe kyautar gwarzon dan wasa na bana, a bikin bayar da kyaututtuka na GQ Türkiye na maza na shekarar nan ta 2025, dan wasan mai shekaru 26 ya sami kyautar mai girma a wajen bikin mai ban sha’awa a da aka yi a daren Laraba.
Ya sami kyautar ne saboda rawar da ya taka a Galatasaray a kakar wasa ta bara, inda ya zura kwallaye 37 kuma ya taimaka wajen zura kwallo sau bakwai a wasanni 41, wanda hakan ya sa Galatasaray ta lashe gasar, Osimhen ya karya tarihin Galatasaray na zama dan wasan da yafi tsada a tarihin kungiyar bayan ya koma akan kudi Yuro miliyan 75 daga Napoli.
- Mahajjata 2,235 Ne Suka Yi Rijistar Aikin Hajjin 2026 A Sokoto
- EFCC Ta Kama Tsohon Gwamnan Anambra Chris Ngige A Abuja
Osimhen ya ci gaba da yin abin da yafi iyawa a wannan kakar, inda ya riga ya zura kwallaye 11 a wasanni 14 da ya bugawa kungiyar dake birnin Istanbul, Galatasaray na matsayi na daya akan teburin babbar gasar kwallon kafa ta kasar Turkiyya da maki 36 a wasanni 15 da ta buga yayinda Trabzonspor ke matsayi na biyu.
Hukumar kwallon kafa ta Nigeria (NFF) ta taya Osimhen murnar samun wannan babbar nasarar a kwallon kafa ta hanyar sanya hoton Osimhen a babban shafinsu na Facebook da yake da mabiya fiye da miliyan daya, Osimhen na daga cikin yan wasan da kocin tawagar ta Super Eagles Eric Chelle ya gayyata domin buga gasar kofin kasashen Afirka da za a buga a Morocco a shekara mai zuwa.
