Sakataren Jam’iyyar APC na Ƙasa, Sanata Ajibola Basiru, ya buƙaci Ministan Babban Birnin Tarayya (FCT), Nyesom Wike, da ya yi murabus daga majalisar ministocin Shugaba Bola Ahmed Tinubu, bisa zargin tsoma baki cikin harkokin cikin gida na jam’iyyar APC. Basiru ya ce matakin Wike bai dace ba, musamman ganin cewa ba ɗan jam’iyyar APC ba ne.
Kiran na Basiru ya biyo bayan gargaɗin da Wike ya yi a ranar Litinin, inda tsohon gwamnan Jihar Ribas ya ce Sakataren APC ya “bar siyasar Ribas,” yana mai bayyana jihar a matsayin “haramtacciyan tsoma baki” ga duk wanda ke son tsoma baki. Wike ya furta hakan ne yayin wata ziyarar godiya da ya kai Karamar Hukumar Oyigbo, inda ya yi barazanar cewa duk wanda ya tsoma baki zai “ƙona hannunsa.”
- Ba Zan Goyi Bayan Tinubu A 2027 Kamar Wike Ba — Makinde
- Rikicin PDP Na Kara Ta’azzara, Yayin Da Bangaren Wike Ke Shirin Gudanar Da Babban Taro
Sai dai, a wata sanarwa da ya fitar daga Osogbo, Jihar Osun, Sanata Basiru ya mayar da martani, yana mai kiran kalaman Wike da “rashin tarbiyya” da kuma zazzafan furuci maras tushe. Ya ce abin mamaki ne yadda wata magana mai sauƙi ta haifar da irin wannan martani daga wani mamba na Majalisar Zartarwa ta Tarayya, yana mai jaddada cewa Wike ba ɗan APC ba ne, don haka ba shi da hurumin tsoma baki a harkokin jam’iyyar.
Basiru ya kuma ƙaryata zargin da Wike ya yi na cewa shugabannin APC na neman rabon wasu kuɗaɗe naira biliyan 600 a Jihar Ribas, yana mai kiran hakan da “cin mutunci da ƙarya.” Ya ƙalubalanci Wike da ya kawo hujjoji ko kuma su haɗu a kotu, tare da jaddada cewa goyon bayan da Wike ke bai wa Shugaba Tinubu bai mayar da shi ɗan APC ba. A ƙarshe, Basiru ya ce abin da ya dace shi ne Wike ya zaɓi ko dai ya kasance ƙwararren minista mara jam’iyya ko kuma ya yi murabus daga muƙaminsa saboda tsoma baki a harkokin APC.
Discussion about this post